“Сүрьеэтэй тэмцэх дэлхийн өдөр” энэ сарын 24-ний өдөр буюу ирэх ням гарагт болно. Манай улсад энэ өдрийг “Бид сүрьеэгүй Монголд амьдрахыг хүсч байна” уриатайгаар хоёр дахь жилдээ тэмдэглэх юм.

  Дэлхий нийтэд сүрьеэгээр өвчлөгсдийн хамгийн эмзэг бүлэг болох хүүхэд багачууд, өндөр настангуудын зүгээс шийдвэр гаргагч нарт хандан сүрьеэг устгахын тулд томоохон алхмуудыг хийхийг шаардаж байгаагаар энэ өдрийг тэмдэглэхээр болжээ. Сүрьеэ өвчин бага зардлаар эмчлэгдэх боломжтой хэдий ч өнөөдөр дэлхий дээр өдөрт 4 мянган хүн уг өвчний шалтгаанаар нас бардаг байна. Энэ нь дэлхий нийтээр сүрьеэгийн эсрэг тэмцэх санхүүжилт хангалтгүй, сүрьеэг оношилдог орчин үеийн технологийг дэлгэрүүлэх хэрэгтэйг харуулж байна.

 Сүрьеэгийн эмчилгээ үйлчилгээг сайжруулснаар сүрьеэ өвчнөөс иргэдийн амь насыг аварч, эдийн засгийн өсөлтөд эерэг нөлөө үзүүлдэг нь дэлхийн олон оронд нотлогджээ. Харамсалтай нь цөөн орон сүрьеэгийн үйлчилгээний хүртээжмийг сайжруулахад анхаарал тавьж, дэлхий дээр сүреэтэй тэмцэхэд шаардлагатай хөрөнгийн 6 хувь буюу 500 сая доллар Олон улсын байгууллагуудаас хандивлагддаг аж.