“Харанга” хамтлагийн ахлагч УГЖ Ц.Энхманлай,  жүжигчин, дуучин, нэвтрүүлэгч Д.Цовоо нар “Манай орцны миний багын дуунууд” цомгоо гурав дахь жилдээ бүтээж байгаа билээ. Өнөөдөр гуравдахь цомог нь  “Hi-Fi” рекордсын бүх салбараар  худалдаанд гарлаа.  Ингээд дуучин Д.Цовоо, Ц.Энхманлай хоёрын сэтгэгдлийг хүргье.

    Д.Цовоо: Бидний тоглолтыг үзсэн хүмүүс улам залуужих шиг болсон

  -Гурван цомгийнхоо шилдэг дуунуудаар "Мартын 8"-нд бүсгүйчүүддээ бэлэг барьсан. Тоглолтынхоо сэтгэгдлээс хуваалцахгүй юу?

-Харанга хамтлагийн дуучин Ц.Энхманлай ах бид хоёр хамтдаа  гуравдахь цомгоо гаргаад өнөөдрөөс худалдаанд гаргаж байна. “Hi-Fi” CD shop-ын бүх салбараар нь худалдаанд  гарч эхэлсэн.   Гурван цомог маань   “Хайрын дуу” хэмээх сайхан тоглолттой хамт болдог  байгаа. Тоглолт маань эмэгтэйчүүдийн баяраар болсон. Маш сайхан тоглолт болж бидний ч, хүмүүсийн ч сэтгэл их өндөр байгаа.  Тоглолтонд оролцсон хүмүүс дурсамжаа сэргээгээд улам илүү залуужих шиг боллоо гэж байсан. Хамгийн гол нь концерт эхлэхэд 20 настай хүмүүс байхад концерт дуусахад бүгд 16 насандаа очсон юм шиг л дурсамжийг сэргээж чадсан байх.

  -Шинэ цомог өмнөх хоёр цомгоосоо юугаараа онцлог вэ?

-60, 70 онд дуулагдаж байсан эргэн дурсахад сэтгэлд дотно дуунууд багтсан.  “Харц”, “Өнчин тогоруу”, “Сумын наадам” гээд хүмүүсийн мэдэх дуунуудыг дуулж хүргэсэн.  Хөгжмийг нь зохиосон, шилдэг ая зохиогчдын  дуунууд гурван цомогт нэг,  нэг орсон. Цомгоо орцны гитартай холбож өгсөн. Гитар бол цомгуудын гол хөгжим байсан учир бид хоёр шинэ гитарууд худалдаж авч цомгоо чимсэн. Дурсамж  хүний сэтгэлийг хөглөж, өнгөрснийхөө алдаа оноог сэргээж байдгаараа хүний амьдралд хэрэгтэй зүйл. Тэгэхээр дууг сонсоод өнгөрөх биш, дуугаар амьдралаа эргэцүүлэн бодож, өнгөрснөө санахад хэрэгтэй байх болов уу? гэж бодсоны үндсэн дээр энэхүү цомгуудаа гаргах боллоо. Гуравдахь цомогт арай хөгжим маш шинэлэг болсон. Өмнөх хоёр цомогт уянгын дууг, уянгын хэлбэрээр дуулсан байгаа.

Маргаашнаас эхэлж гурван цомгийн багц гарна. Тэгэхээр тус тусдаа зарагдахаасаа арай хямд үнээр багцын цомгийг худалдаалах юм.


-“Манай орцны миний багын дуунууд”  гэх нэрийг яагаад өгөх болов?

-Орцон дуулдаг байсан учраас бодож байгаад л  энэ нэрийг өгсөн. Арай богино нэр өгөхийг бодсон ч арай л болохгүй байсан. Би багадаа дуулж байсан. Мөн орцондоо дуулж байсан тиймээс энэ нэр тохиромжтой гэж бодсон.

    Ц.Энхманлай: Цомог маань ашгийн бус гэдэг үүднээс 1000 ширхэг хэвлэгдсэн

-Яагаад энэ цомгийг гаргах болов?

- Эхний цомгийг гаргахаар Д.Цовоо надад саналаа хэлсэн.  60, 70, 80-иад оны хүмүүсийн орцондоо дуулдаг байсан дуунуудыг цомог болгож  тухайн үеийн дурсамжийг сэргээе  гэсэн санал тавиад энэхүү гурван цомгоо гаргалаа. Эхний цомогт 18 дуу багтсан. Сүүлд гарсан “Манай орцны миний багын дуунууд-2” цомог 14 дуунаас бүрдсэн. Харин энэ цомогт  есөн дуу багтсан байгаа. Нийлээд 40-иөд дууг цомог болгожээ. Орцонд хүмүүс гитартай дуулдаг байсан. Тиймээс гитарын дуугаралтыг яаж өргөн байлгах вэ гэдэг талаар нэлээн бодож хийсэн.  Эхлээд гурван цомог гаргана гэж бодоогүй. Харин хүмүүс эхний цомгийг сонсоод дахин тэр үеийн хүмүүсийн сонсох дуртай байсан дуунуудыг санал болгож эхэлсэн.

-60-80 оны дуунууд гэдэг  тухайн үеийн хөгжмийн түүхийг харуулах байх.  Тэгэхээр 2013 оны  залуучуудын дуулдаг дуунуудаас эрс ялгаатай байгаа байх?

-Аливаа юм хөгжлийнхөө явцад өөрчлөгддөг. Хүмүүсийн хөгжмийн боловсрол сонирхол өөр өөр. 60-80 оны дуунууд бол поп болгох гэж оролдсон дуунууд ч байна. Мөн орос аятай, эсвэл өнөө үеийн нийтийн дуутай төстэй ч байна.

-Энэхүү гурван цомогт орцонд дуулж байсан дуунуудаас  өөр дуу багтсан уу?

-Орцонд дуулж байсан дуунуудаас гадна хөгмжийн зохиолчдын  Цовоод зориулж зохиож өгсөн дуунууд  орсон байгаа. “Чингис хаан” хамтлагийн даралтат хөгжимчин  Байдрагийн  зохиосон “Чамдаа” дуу,  хоёрдахь цомогт миний өөрийн зохиосон  “Зөвхөн чамайг”,  гуравдахь цомогт хөгжмийн зохиолч Пүрэвдоржийн “Бүжиглэцгээе”  дуунууд багтсан. Тэгэхээр энэ цомгуудыг арилжааны сэдлээр биш тухайн үеийн дуунууд хийгээд дурсамж сэргээх  зорилготой хийсэн.

-Цомгоо хэдэн хувь хэвлүүлсэн бэ?

-Цомгууд 1000 ширхэг хэвлэгдсэн. Бусад хамтлаг дуучид 3000-5000 ширхэг хэвлүүлдэг. Харин бид хоёр цомгуудаа ашгийн бус гэдэг үүднээс 1000 ширхэгийг хэвлүүлсэн. Гэхдээ худалдаанд 800 гаруй л гарсан. Үлдсэнийг нь найз нөхөд гээд л хүмүүст бэлэглэсэн.