МАХН-ын Гүйцэтгэх товчоо өнөөдөр 13.00 цагт шуурхай хуралдлаа. Хуралдаанаар хоёр ажлын хэсэг гаргаж, Улсын дээд шүүхийн Ерөнхий шүүгч Ц.Зоригдхандан мэдэгдэл гаргасан байна. Өнгөрсөн сар шинийн баярын үеэр МАН-ын ахмад гишүүн Д.Загджаваар ахлуулсан гишүүд МАХН-ын ахмад гишүүд болон дэд дарга Д.Тэрбишдагватай уулзаж угшил нэгтэй хоёр намыг нэгтгэх санал тавьж байсан. Тэгвэл МАХН-ын Гүйцэтгэх товчоо МАН-тай хамтран ажиллах талаар судалгаа хийх ажлын хэсэг гаргажээ. Уг ажлын хэсгийг УИХ-ын дэд дарга Л.Цог ахлан ажиллах юм байна.
МАХН энэ сарын 18-нд нэр бүхий УИХ-ын таван гишүүнтэй хамтын ажиллагааны гэрээ байгуулж, үүнийг намын дарга Н.Энхбаяр батлах ёстой байжээ. Гэтэл Шүүхийн шийдвэр биелүүлэх газар уг гэрээг санаатайгаар саатуулсан байна. Тиймээс өнөөдөр хуралдсан Гүйцэтгэх товчооны хурлаар Намын даргын ажлын алба хариуцсан нарийн бичгийн дарга Ш.Нанжидаар ахлуулсан ажлын хэсэг гаргажээ. Уг ажлын хэсэг Хууль зүйн сайд асан Ц.Нямдорж, сайд Х.Тэмүүжин нарт хандан зохих асуудлыг тавихаар бэлдэж байгаа юм байна.
Мөн МАХН-ын Гүйцэтгэх товчоо Улсын дээд шүүхийн Ерөнхий шүүгч Ц.Зоригд хандан мэдэгдэл гаргасан байна. Ерөнхий шүүгч Ц.Зориг нь МАХН-ын дарга Н.Энхбаяртай холбоотой хэргийг Дээд шүүхийн нийт шүүгчдийн хуралдаанаар оруулж хэлэлцүүлэх боломжгүй гэсэн шалтгаанаа дурьдаагүйгээс гадна өөрөө хариу өгөөгүй нь хууль зөрчиж байгаа юм. Тиймээс Гүйцэтгэх товчоо ийнхүү мэдэгдэл гаргаж байгаа юм байна.
Б.Золбоо
Сэтгэгдэл (12)