Оюутолгойн хөрөнгө оруулалтын гэрээ зурснаас хойшхи 36 сарын хугацаанд хөрөнгө оруулагчид ашиг хүртэж эхлээгүй ч уг төслөөс Монголын Засгийн газарт нийт 803 сая ам.долларын татвар төлсөн хэмээн Оюу Толгой ХХК-ийн Ерөнхийлөгч  Камерон Макрей мэдэгдсэн.

   "Рио Тинто" компаниас "Оюутолгой" ХХК-ийн үйл ажиллагааны төлөвлөгөө болон санхүүжилтын хувилбарууд гэсэн асуудлыг төслийн санхүүжилттэй холбон  дараагийн хөрөнгө оруулалт шаардагдаж байгааг онцолсон. Үүнтэй холбогдуулан тус компаниас төслийг хэрэгжүүлэхэд урьдчилгаа болгон Монгол Улсын Засгийн газарт зээлсэн 250 сая ам.долларыг хүүгийн хамт буцаан авах шаардлагатай байгааг уламжилсан юм.

   Энэ тухай Оюутолгойн хувь нийлүүлэгчдийн хуралдааны дараа буюу өнгөрсөн хоёрдугаар сарын 7-нд Сангийн сайд Ч.Улаан мэдэгдэхдээ, "Оюутолгой ХХК 2012 онд монголд нэг ч төгрөгийн татвар төлөөгүй хэмээн онцолсон.
 
  Мөн тэрээр "Монгол Улсын Засгийн газар энэ төслийн урьдчилгаа төлбөр хэлбэрээр авсан 250 сая ам.долларын эргэн төлөлт хугацаа алдаж байгааг хөрөнгө оруулагчид хэлж байгаа. Татварын орлогоос суутган тооцох байсан ч энэ ажил хийгдээгүй. Төслийн санхүүгийн асуудал үүнээс болон хүндэрч байна гэсэн. Харин үүнд өгөх хариу маш тодорхой. Гол нь тэд хуулийн хүрээнд ажиллаж, гэрээгээ мөрдөх ёстой. Зээлийг төлж дуусгах хугацааг тодорхой заасан  ч жилд хэдий хэмжээний зээл суутган тооцох нь тусгагдаагүй. Суутган тооцолтын хэмжээг талууд харилцан тохиролцож тогтох ёстой бөгөөд үүнийгээ тогтооё гэж Сангийн яам удаа дараа санал тавьсан ч өнөөг хүртэл асуудал шийдэгдээгүй байна. Зээлэнд суутгах төлбөрийг Улсын төсөвт суулгаж батлуулсны дараа Засгийн газарт эрх нь нээгдэнэ. Хөрөнгө оруулагч тал 2012 оноос эхлэн суутган тооцох ёстой гэсэн санал ирүүлсэн үүнд бид 2014 оноос тооцно гэсэн хариу өгсөн. Учир нь 2013 оны төсөвт энэ тухай  тусгагдаагүй учир 2014 оноос тооцохоос өөр боломжгүй. Тиймээс хуулийн хүрээнд Оюутолгой компани татвараа төлөх ёстой" гэв.