Эрүүл мэндийн сайд Н.Удвал “Эрүүл мэндэд иргэн таны оролцоо” сэдэвт нээлттэй хэлэлцүүлгийг орон даяар өрнүүлж байгаагийн энэ удаагийнх Өмнөговь аймгийн төв Даланзадгад хотод болов.

Тэрээр нээлттэй хэлэлцүүлэгтээ Монгол Улсын төдийгүй, тухайн орон нутгийн хэмжээнд эрүүл мэндийн анхаарал татаж байгаа асуудлыг онцлон танилцуулж, хүн амын эрүүл мэндийг тодорхойлогч хүчин зүйлс нь зөвхөн эрүүл мэндийн байгууллага, эмч, сувилагч, мэргэжилтнүүдийн асуудал биш бөгөөд эрүүл мэндэд хувь хүний хүчин зүйлс 55 хувийг эзэлдэг тул иргэн таны оролцоо хамгийн чухал гэдгийг өргөн хүрээтэй тайлбарлалаа.

Мөн иргэн та өөрийн эрүүл мэндээ хамгаалах талаар юу хийж чадах вэ? Бусад салбар иргэдийн эрүүл мэндэд ямар оролцоотой вэ? Аймаг сум багийн зүгээс иргэдийнхээ эрүүл мэндийн асуудалд хэрхэн оролцох вэ? гэх мэт олон сэдвийн хүрээнд авч хэлэлцсэн бөгөөд тус аймгийн хэмжээнд амьсгалын замын болон зүрх судасны өвчлөл ерөнхийдөө их байгаагаас гадна 1-5 насны хүүхдийн эндэгдлийн шалтгаанд осол гэмтлийн тохиолдол ихэссэн байгааг анхаарах шаардлагатай байгаа талаар дурдлаа.

Иргэдийн зүгээс олон санал, санаачлагуудыг хэлж байсны ихэнх нь өвдөхгүй эрүүл байх, ажилчдын эрүүл мэндийг хамгаалах, ажлын байрны дасгал хөдөлгөөнийг хэвшил болгон хийх, эрүүл мэндийн байгууллагуудын мөрдөж буй эмчилгээ үйлчилгээний стандартуудыг шинэчлэх тал дээр анхаарах, Бүсийн оношилгоо эмчилгээний төвд эмийн бус эмчилгээ, физик эмчилгээ, биеийн тамир, хөдөлгөөний эмчилгээг нэмэгдүүлэх, сум, өрхийн эрүүл мэндийн төвүүдийн оношилгоо эмчилгээний чадамжийг дээшлүүлэх, бруцёллез өвчний оношилгоо, эмчилгээний асуудлыг шийдэх зэрэг асуудал байв. Сайд Шинэчлэлийн Засгийн газрын үйл ажиллагаанд иргэдийн саналыг тусгах, иргэн төвтэй нийгмийг төлөвшүүлэх зорилгын хүрээнд нээлттэй хэлэлцүүлгээ зохион байгуулж буйг онцлоод, иргэдийн асуултуудад дэлгэрэнгүй хариулт өгөв.

Түүнчлэн иргэдийн зүгээс эрүүл мэндийн нээлттэй хэлэлцүүлгийг аймаг, дүүрэг тус бүрээр хийж, эрүүл мэндийн бодлого, шийдвэрт иргэдийн оролцоог нэмэгдүүлэн иргэдээ сонсож, эрүүл мэндийн шинэчлэлийг өрнүүлж байгаа нь салбарын Сайдын мэргэжил ур чадвар, оновчтой бодлогын илэрхийлэл болж байгаад нь талархал илэрхийлэв. Эрүүл мэндийн сайдын ажлын айлчлалд тус нутгийн иргэд сэтгэл хангалуун байлаа.

Мөн Эрүүл мэндийн сайд аймгийн ЭМГ болон БОЭТ-ийн үйл ажиллагаатай танилцаж, эмч ажилчидад Шинэчлэлийн Засгийн газрын бодлого, шийдвэрийн талаар танилцуулав. Эмч ажилчдын зүгээс ажилчдын цалинд чанарын өөрчлөлт гаргах, БОЭТ, Ханбогд, Цогтцэций сумдын барилгын асуудал, эмнэлгийн ажилтнуудын мэдлэг мэргэжлээ дээшлүүлэх, салбарын ажилчдын эрүүл мэндийн асуудал зэрэг олон талт сэдвээр хэлэлцэв. Уулзалтад Эрүүл мэндийн сайд Н.Удвал, УИХ-ын гишүүн Л.Цог, БТГ-ын дарга Ц.Цолмонгэрэл, аймгийн Засаг даргын орлогч Д.Нацагдорж, НХХ-н дарга Н.Жамъянхорол, аймгийн ЭМГ–ын дарга Ч.Баяржаргал нар оролцжээ. Уулзалтын дараа салбартаа үр бүтээлтэй, олон жил ажилласан зарим ажилчдыг “Эрүүлийг хамгаалахын тэргүүний ажилтан” цол, тэмдгээр шагнаж урамшуулжээ.