МУБИС-ийн Дүрслэх Урлаг Технологийн cургуулийн багш, Монголын Урчуудын Эвлэлийн гишүүн, зураач О.Доржготовын уран бүтээлийн бие даасан “Хөх тасархай” нэртэй үзэсгэлэн өнөөдөр нээлтээ хийх гэж байна. Монголын Урчуудын Эвлэлийн үзэсгэлэнгийн танхимд гарах уг үзэсгэлэн түүний гурав дахь бие даасан үзэсгэлэн юм. Эх орондоо төдийгүй Япон, БНХАУ, АНУ, Финлянд зэрэг улсад бие даасан болон хамтарсан үзэсгэлэнгүүдэд оролцож байжээ. Энэхүү үзэсгэлэнд түүний Монгол зургийн уламжлалт арга барилаар зурсан бүтээлүүд болон өнгө, зохиомжийн шинэлэг шийдлээр бүтээсэн 26 бүтээл тавигдах аж.“Хөх тасархай” хэмээх бүтээлээрээ үзэсгэлэнгээ нэрлэснээ тайлбарлахдаа “Овоо оролцоотойгоор бүтсэн хамгийн эртний туурвилуудын нэг юм. Монголчууд өн эртнээс мөнх тэнгэрийг шүтэж, байгаль дэлхийгээ дээдлэж, хайрлан хамгаалж ирсний илэрхийлэл нь овоо юм. Энэхүү бүтээлээрээ өвөг дээдсээс үлдээсэн ариун дагшин эх нутгаа хайрлан хамгаалж, оюуны болон байгалийн хэмжээлшгүй их баялагаа ухаалгаар хүртэн амьдрахыг даяарчлалын эрин зуунд хүн төрөлхтөнтэй хөл нийлүүлэн алхаж буй элэг нэгт Монголчууддаа уриалсан болно. Өндөр уулын орой дээрхи эрдэнийн чулуугаар босгосон овооны гол модноос таван өнгийн хадаг яндир салхины аясаар өнгө сүлэлдэн хийсэх агаад зуун зууны түүхийг хүүрнэх овооны оройд хадаганд нандигнан ороож өргөсөн мөнгөн аяга цухуйна. Энэ нь зохиомжийн гол төвийг хураан зангидах агаад хүмүүний оюуны ур, байгалийн баялаг, тансагийн яруу тодыг илтгэнэ. Овооны хадаг Монголын хөх тасархай…” гэжээ.
