Монгол Улсын иргэн, зургаан настай С.Амарбаясгалан хүүг БНСУ-ын “Инчеон” олон улсын нисэх онгоцны буудлын транзит танхимд харгалзах хүнгүй, ганцаараа байгаа тухай мэдээлэл гуравдугаар сарын 31-ний өдөр ГХЯ-нд ирсэний дагуу тус яам болон Монгол Улсаас БНСУ-д суугаа ЭСЯ хүүхдийн ар гэртэй нь холбоо тогтоож, хүүгийн эцгээс тус яаманд ирүүлсэн өргөдлийн дагуу тухайн өдрийн “Корейн Эйр” компанийн оройн нислэгээр Монгол Улсад буцаан ирүүлэв. Хүү чухам ямар учраас ганцаараа тус онгоцны буудалд байгаа болон хэрхэн хил давсан талаар Хууль зүйн сайд Х.Тэмүүжин ярихдаа "Хүү  “Korea air” компанийн “Гараас гарт” үйлчилгээгээр Монгол Улсаас БНСУ-ыг зорьсон байна. “Korea air” компани хүүг хариуцаж очих ёстой газар нь хүргэх үүрэгтэй. Хүүгийн ээж бичиг баримтыг нь бүрдүүлээд, Фижид байдаг нагац эгч рүү нь хүүгээ явуулсан. Фижид буухад нь ээжийнх нь эгч тосч авах юм" гэж хэлсэн бол ГХЯ-ны сайд Л.Болд хүүгийн талаар арай өөр тайлбарыг хийж байсан.


 Тэрээр "Консулын газрынханд Амарбаясгалан хүүг Монгол руу эхний нислэгээр даруй буцаан ирүүлэх үүрэг өгсөн. С.Амарбаясгалангийн аав хүүгээ Солонгос руу явахыг нь мэдээгүй учраас өргөдөл гаргасан байна.

“Чингис хаан” Олон улсын нисэх буудалд С.Амарбаясгаланг эмчийн үзлэгт оруулж, хууль, хяналтын байгууллагын шийдвэрийн дагуу ар гэрийнхэнд нь хүлээлгэж өгөв. Цаашид, иргэд бага насны хүүхдээ гадаад улс орон руу харгалзах хүнгүй явуулах асуудалд болгоомжтой хандаж байхыг тус яамнаас зөвлөж байна.