МАН-ын Мэдээллийн технологийн хэлтсийн дарга, Бага хурлын гишүүн Б.Цогтгэрэлийг өнөөдөр Чингэлтэй дүүргийн шүүхэд 09.00 цагаас шүүнэ гэж байсан ч энэ сарын 15-нийг хүртэл хойшлууллаа. Учир нь шүүгдэгч Б.Цогтгэрэлийн эсрэг гомдол гаргасан хүмүүс нь ирээгүй байна.

  Тэрээр 2013 оны Орон нутгийн сонгуулийн сурталчилгааны үеэр хэвлэн нийтлэх үйл ажиллагааныхаа явцад бусдыг онц ноцтой гэмт хэрэгт гүтгэсэн, эрх чөлөөнд нь санаатайгаар халдсан гэх шалтгаанаар буруутгагдаж буй.

    Тиймээс түүнийг Эрүүгийн хуулийн 111.2 хэсэгт зааснаар буруутган шүүнэ. Тус зүйл ангид гүтгэлгийг олон нийтэд тараасан, эсхүл доромжлох, гүтгэх гэмт хэрэгт урьд ял шийтгүүлсэн этгээд үйлдсэн бол хөдөлмөрийн хөлсний доод хэмжээг тавин нэгээс нэг зуун тавь дахин нэмэгдүүлсэнтэй тэнцэх хэмжээний төгрөгөөр торгох, эсхүл гурваас дээш зургаан сар хүртэл хугацаагаар баривчлах ял шийтгэнэ хэмээн заажээ.

    Түүнийг өнгөрсөн нэгдүгээр сарын 8-нд ШШГЕГ-ын харьяа цагдан хорих 461 дүгээр ангид саатуулсан ч биеийн байдал нь  муудсанаар өнгөрсөн хоёрдугаар сарын 1-нд батлан даалтад гаргасан юм.