УИХ-ын гишүүн С.Ганбаатар “Рио Тинто”-г Гаагийн олон улсын шүүхэд өгөхөөр болсон тухайгаа сэтгүүлчдэд мэдэгдлээ.
    УИХ-ын гишүүн С.Ганбаатар “Рио Тинто”-г Гаагийн олон улсын шүүхэд өгөхөөр болсон тухайгаа сэтгүүлчдэд мэдэгдлээ.

     Тэрээр ярихдаа,“НҮБ-аас байгалийн нөөцөд тулгуурлан хөгжиж буй орнууд байгалийн нөөцдөө эзэн байх үүднээс халдашгүй дархан эрхийг тунхаглаж “1803” дугаар шийдвэрийг гаргасан. Үүний хэрэгжилтийг Гааг-ийн шүүх хянадаг. Тиймээс бид тус шүүхэд хандахаар болоод байна. Мөн НҮБ-ийн удирдлагад энэ талаар мэдээлэл явуулахаар болсон. Хөрөнгө оруулалтын гэрээ байгуулж байхдаа хөрөнгө оруулагч нар Монгол Улсын Засгийн газартай “Good faith”  буюу шударга хэлэлцээрийн болон тэгш эрхийн зарчмыг баримтлаагүй. Үүнээс гадна говийн усны нөөцөд “Рио тинто” заналхийлж байна

    Тодруулбал, Оюутолгойн баяжуулах үйлдвэрийн өнөөдрийн хүчин чадлаар усны хэрэгцээг нь тооцвол уг үйлдвэр нь Гүний хоолойн усны тогтоогдсон нөөцөөс /жилд 35,4 сая м3/ хамаагүй давж байгаа бөгөөд Монголын усны эрдэмтдийн гурван хувилбараар тооцоолсноор 37.8, 54.7, 82.1 сая м3 гэсэн ус ашиглах тооцоо гарсан байна. Гэтэл Оюутолгойд зөвшөөрөгдсөн усны хэмжээ нь 27,4 сая м3” гэлээ. Эдгээр асуудлуудтай холбоотой хэргийг Гаагийн шүүхэд өгөхөөс гадна Лондон хотын дүүргийн шүүхэд гомдол гаргаж, Женевийн олон улсын хурал уулзалтуудад мэдээлэл хүргүүлнэ хэмээн мэдэгдэв.

        Мөн тэрээр BBC-ийн сэтгүүлч Р.Жастин  Оюутолгойн тухай бичсэн нийтлэлийг хөндсөн юм. Тус нийтлэлд Оюутолгойн хөрөнгийг 320-400 тэрбум ам. доллар гэж тооцоолжээ. Сэтгүүлч Р.Жастин  бичихдээ, “Монголын говьд үйл ажиллагаа явуулж байгаа Оюутолгой жилд найман тэрбум доллар бий болгоно” гэжээ. Үүнийг С.Ганбаатар гишүүн тайлбарлахдаа, “Р.Жастины бичсэнээр Оюутолгой 40-50 жил үргэлжлэх тооцоолол гарч байна. Оюутолгой үйлдвэрээ босгоход зургаан тэрбум ам. доллар зарцуулсан. Тэгэхээр нийт орлого найман тэрбум цаашдаа олоод явахад манайх яагаад үүнд эрх тэгш хандаж болохгүй гэж” хэмээв.

    Тэрээр “Монголын хөрөнгө оруулалт багасч байна. Үүнд Оюутолгойн гэрээг засварлах болсонтой холбон нэг хэсэг нь тайлбарлаж байна. Энэ тухайд?" гэсэн асуултад “ Хөрөнгө оруулалт гэдэг өсч ч байдаг, буурч л байдаг зүйл. Буурч байгааг “Рио Тинго”-с ташаа мэдээлэл олон улсад цацаж байхыг үгүйсгэхгүй юм” гэлээ.