“Нарантуул” худалдааны удирдлагууд 385-425 мянган төгрөгийн үнэтэй төмөр авдар хийлгэн түрээслэгчиддээ шахжээ.
  Ингэхдээ “Тээш болон түрэлтийн үнэ хойшид авахгүй та нарт амар болно” гэж мэдэгдэж байж. Мөн өнгөрсөн оны аравдугаар сараас камержуулалт болон цахилгааны хөлс хэмээн 10 мянган төгрөгийг сар бүр авдаг болсон аж.  Гэтэл одоо дахин төмөр авдар бүрээс 30.000 төгрөгийг цахилгаан, камержуулалтын хөлс гэж авч эхэлжээ. Энэ тухай тодруулахаар хэсэг түрээслэгчид "Нарантуул" захын хяналтын албаны дарга Нарантуяа дээр орсон боловч “Та нар төл. Эсвэл газрыг чинь хураана” гэсэн хариу өгчээ. Иймээс түрээслэгчид ҮЭХ-нд өргөдөл ирүүлсэн байна.
 Байгалийн хүнд хатуу нөхцөлд эрүүл мэндээ золиослон хөдөлмөрлөж, түрээс төлбөрөө цаг тухайд нь төлж ирсэн түрээслэгчдийн ажлын байрыг 30 мянган төгрөг өгөөгүйн төлөө хураана хэмээн дарамтлан, хүчээр авч байгаа увайгүй үйлдлийг зогсоохын тулд тэд ийнхүү ОНМХ-ээр дуу хоолойгоо хүргэж эхэлжээ. "Нарантуул" захын удирдлагуудын бусармаг үйлдлийг илчлэх хүсэлтэй хүмүүс олон байдаг ч хэтэрхий дарамт шахалтад байдаг учир илчилж чадахгүй өдийг хүрсэн хэмээн түрээслэгчид ярьж байна. Тэд өмгөөлөгч хүртэл авч, холбогдох газруудад өөрсдийн хүсэлтийг гарган өнөөдрөөс эхлэн бусармаг явдалтай тэмцэхээр шийдсэн тухайгаа хэвлэлийн бага хурлын үеэр хэллээ.