Нийслэлийн Засаг дарга бөгөөд Улаанбаатар хотын Захирагч Э.Бат-Үүл АНУ-ын Олон улсын хөгжлийн агентлагийн санхүүжилттэй  “Бизнесийг дэмжих санаачлага төсөл”-ийн удирдагч Эфрайн Лаурианыг хүлээн авч уулзлаа. Нийслэлийн Засаг даргын 2013-2016 оны үйл ажиллагааны хөтөлбөрт тусгасан “Төрийн үйл ажиллагааг нээлттэй ил тод байлгаж, төрийн үйлчилгээг чирэгдэлгүй, нэг цонхоор хүргэх” зорилтын хүрээнд Бүгд найрамдах Гүрж улсын зөвлөх багийнхан нийслэлд хүрэлцэн ирж, нэг цэгийн үйлчилгээг хэрхэн хүргэж байгаатай танилцсан юм. Тус улс нь барилгын зөвшөөрлийг хамгийн хурдан, чирэгдэлгүйгээр олгодог гэдгээрээ Дэлхийн банкны гаргасан судалгаагаар 185 орноос 3-т бичигддэг байна. 14 хоногийн хугацаанд ажилласан зөвлөх багийнхан цаашид “Нэг цэг”-ийн үйлчилгээг иргэдэд чирэгдэлгүйгээр хэрхэн хүргэх, барилгын зөвшөөрлийг нэг цэгийн үйлчилгээгээр яаж олгох талаар гаргасан зөвлөмжөө нийслэлийн Засаг даргад уламжиллаа.

Зөвлөмжид барилгын зөвшөөрөл олгож буй шат дамжлагыг хэд дахин багасгах, цаашлаад төрийн албан хаагчид авлига, хээл хахуульд хардагдах, өртөхгүй байхын тулд иргэдэд бүрэн үйлчилдэг “Нэг цэг”-ийн төрийн үйлчилгээний хэлтсийг байгуулах шаардлагатай байна гэлээ.  Иргэд  барилгын зөвшөөрөл авахдаа олон газар хандаж, хүсэлт тавьдаг системийг өөрчилж зөвхөн энэ хэлтэст хандан зөвшөөрлөө авдаг болно гэдгийг онцолсон юм. Харин нийслэлийн Засаг дарга бөгөөд Улаанбаатар хотын Захирагч Э.Бат-Үүл юуны өмнө  нэг цэгийн үйлчилгээг сайжруулах талаар зөвлөмж хүргүүлсэнд талархал илэрхийлээд, нийслэлийн иргэдэд төрийн үйлчилгээг чирэгдэлгүй, шат дамжлаг багатайгаар хүргэх бодлого баримталж байгаагийн хувьд та бүхний зөвлөмжийг хугацаа алдалгүйгээр ажил хэрэг болгоно.

Ойрын хугацаанд “Захиргааны үйлчилгээний нийтлэг журам”-ыг боловсруулан гаргаж, НИТХ-ын хурлаар батлуулахаар төлөвлөж байна. Харин журмыг боловсруулахад  мэргэжлийн арга зүйн туслалцаа үзүүлэхийг эрхэм Эфрайн Лаурианаас хүссэн юм. “Бизнесийн дэмжих санаачлага төсөл”-ийн удирдагч Эфрайн Лауриано “Улаанбаатар хотын удирдлагатай хамтран ажиллахдаа нэн таатай байна. Хууль эрх зүйн талаасаа ч дэмжлэг үзүүлнэ” гэлээ. Уулзалтын төгсгөлд иргэдэд нэг цэгийн үйлчилгээг шуурхай хүргэх “Захиргааны үйлчилгээний нийтлэг журам”-ыг боловсруулах ажлын хэсэг байгуулахаар болж, нийслэлийн ЗДТГ-ын Нутгийн захиргааны удирдлагын хэлтсийн дарга Ү.Ганболдод зохион байгуулах үүрэг өглөө гэж Нийслэлийн Хэвлэл мэдээлэл, олон нийттэй харилцах хэлтсээс мэдээллээ.