Өнгөрсөн хоногт зэвсэглэсэн этгээдүүд цагдаагийн алба хаагчийн биед халдаж, амь насыг нь хохироосон хэрэг гарлаа. Энэ талаар ЦЕГ-ын Хэвлэл мэдээллийн төвийн дарга, хурандаа Т.Сайнжаргалаас тодрууллаа.
    Өнгөрсөн хоногт зэвсэглэсэн этгээдүүд цагдаагийн алба хаагчийн биед халдаж, амь насыг нь хохироосон хэрэг гарлаа. Энэ талаар ЦЕГ-ын Хэвлэл мэдээллийн төвийн дарга, хурандаа Т.Сайнжаргалаас тодрууллаа.

-Хэргийн талаар тодруулахгүй юу?

-Ховд аймгийн Булган суманд өнгөрсөн шөнө 23.50 цагт цагдаагийн алба хаагч, дэд ахлагч Н.Төмөрчөдөр албан үүргээ гүйцэтгэж байгаад амиа алдсан хэрэг гарсан. Зэвсэгтэй этгээдүүд буудаж, амь насыг нь хохироосон байна. Ховд аймгийн цагдаагийн газрынхан мэдээлэл авсан даруй Ч.Дөлбадрахаар ахлуулсан ажлын хэсэг томилогдож, шөнө хэргийн газар ажилласан.

-Хэрэг юунаас болж гарсан юм бол?

-Тус аймгийн Булган сумын нутаг, Бүрэн хайрхан багийн нутагт эргүүлийн үүрэг гүйцэтгэж явсан цагдаагийн ажилтан, ахмад Н.Баатархаан тус газарт байрлах Бүрэн нэртэй авто сэлбэгийн дэлгүүрийн хаалганы цоож нэг нь эвдэрсэн,  нэг нь цүүнээс нь салсан байгааг ажиглаад хулгайн гэмт хэрэг гарсан байж болзошгүй хэмээн сумын цагдаагийн тасгийн жижүүрт утасдаж, мэдэгдсэн байгаа юм. Мэдээллийн дагуу эргүүлийн үүрэг гүйцэтгэж байсан гурван цагдаагийн ахлагч дэлгүүрт ирсэн. Тэгээд дэлгүүрт хулгай орсон эсэхийг шалгахаар дотор нь орсон гэсэн. Шөнө учраас дэлгүүр тас харанхуй байсан. Тэгээд харанхуйгаас гэнэт буун дуу гарч, цагдаагийн дэд ахлагч лангуун дээр унасан. Тэгээд цагдаагийн офицер хоёр ахлагчдаа үүрэг өгч, Н.Төмөрчөдөрийг яаралтай авч гарахыг мэдэгдээд өөрөө гараад ажиглалт хийсэн. Гэмт этгээдүүдэд анхааруулга өгөхөд гэмт этгээдүүд “Буудлаа, ална шүү” хэмээн заналхийлсэн байгаа юм. Тэгээд дэлгүүрийн цонхоор гарч, хойд зүг рүү зугатсан байна. Цагдаагийн гурван алба хаагч хойноос нь хөөсөн боловч харанхуй руу орж алга болсон байгаа юм.

-Н.Төмөрчөдөр газар дээрээ амиа алдсан юм уу?

-Үгүй. Эмнэлэгт хүргэгдэх замдаа нас барсан.

-Тэгээд гэмт этгээдүүдийг бариагүй юу?

-Мэдээллийг ЦЕГ-ын удирдлага хүлээн авч, өчигдөр орой шуурхай хуралдаж, ЦЕГ-ын тушаалаар ажлын хэсэг томилогдож, өнөөдөр нисдэг тэргээр үүрээр Ховд аймгийн зорьсон.  Гэмт этгээдүүдийг барих, дахин гэмт хэрэг үйлдэхээс сэргийлэх, болзошгүй аюулыг арилгахаар ажиллаж байна. Хэрэг гарсан даруйд Ховд, Увс, Баян-Өлгийн зэргэлдээх аймгийн цагдаагийн газруудтай шууд холбогдож, хилийн отряд, онцгой байдлын газартай  холбогдон аюулыг арилгах, гэмт этгээдийг барих ажлыг хийж байна. Өнөөдөр дахин нэмэлт ажлын хэсэг ажиллахаар явах гэж байна.

-Н.Төмөрчөдөрийн тухай?

-20 настай. Ээж, дүүтэйгээ амьдардаг байсан. Өнгөрсөн нэгдүгээр сарын 3-ны өдөр Ховд аймгийн цагдаагийн газарт дэд ахлагч цолтойгоор уг суманд томилогдож ирээд ажиллаж байсан.

-Ховдын хорих ангиас оргосон гурван хоригдолтой холбоотой юу?

-Оргодлуудаас нэг нь өчигдөр баригдсан. Хоёр нь баригдаагүй байгаа. Бид оргодлуудтай холбоотой байж болзошгүй хэмээн бүхий л байдлаар шалгаж байна.

-Гэмт хэргийг таслан зогсоохоор очсон цагдаа нарт галт зэвсэг байсан уу?

-Галт зэвсэг хэрэглээгүй. Эргүүлийн багаж байсан. Ажлын хэсэг шалгаж байна.