Хил хамгаалах байгууллага үүсч байгуулагдсаны 80 жилийн ой энэ жил тохиож байна. Ойн хүрээнд хийх ажлын талаар ХХЕГ-ын удирдлагууд өнөөдөр мэдээлэл хийлээ.

Өдгөө 80 нас хүрч буй Хил хамгаалах байгууллагын ой энэ оны есдүгээр сарын 17-нд тохиох юм.

ХХЕГ-ын түүхт 80 жилийн ойн өдрийг угтан олон үйл ажиллагаа зохион байгуулж байгаа юм байна. Үүнд, хил хамгаалах байгууллагаас төрсөн баатруудыг шагнуулах, дайнд оролцсон  отряд, комендатуруудыг шагнуулах талаар хэлэлцэж байгаа аж.  Мөн сурагчдын дунд эссэ бичлэгийн уралдаан, уран бүтээлчдын дунд “Хилчдийн дуу” дууны шүлгийн уралдаан зарлажээ. Мөн хилчдийн амьдралыг харуулсан “Босоо тотго” 60 ангит уран сайхны киног ойн өдөрт зориулан гаргахаар болж, зураг авалтыг Монгол орны хилийн заставууд дээр хийж байгаа юм байна. Хилчдийн амьдралыг харуулсан уран сайхны киноноос гадна баримтат кино, гэрэл зургийн болон уран зургийн үзэсгэлэн, нээлттэй хаалганы өдөрлөг, үдшийн цэнгүүн зэрэг олон  үйл ажиллагааг зохион байгуулахаар төлөвлөжээ.

ХХЕГ-аас онцлон зохион байгуулж буй нэг үйл ажиллагаа бол хэвлэл мэдээллийн сэтгүүлчдийг торгон хилийн зурвастай танилцуулах аялал юм.