Дэлхийн бөмбөрцгийн хамгийн хойд цэг болох Хойд өргөргийн 90°-т хүрч, томоохон хэмжээний аялалыг гүйцэтгэх гэж буй МУГТ Г.Өсөхбаяр ээлжит аялалаа энэ сарын 10-аас эхлэх гэж байна. Ирэх бямба гаригт /04.06/ эх орноосоо мордох гэж буй уулчин Г.Өсөхбаярыг өнөөдөр 11.00 цагаас тус аяллын дэмжигч Соёл, спорт, аялал жуулчлалын яамны Спортын бэлтгэлийн төвийн дарга Б.Наранбаатар хүлээн авч уулзлаа.

Энэхүү түүхэн аяллыг Монгол Улсын Ерөнхийлөгч Ц.Элбэгдорж санаачилсан бол Ерөнхий зохион байгуулагчаар Соёл, спорт, аялал жуулчлалын яам, Спортын бэлтгэлийн төв ажиллаж байгаа юм.

Хойд туйлын 90 градуст очсоноороо Дэлхийн дулаарал, цаг уурын өөрчлөлтийн эсрэг нэгдэж байгаа монголчуудын дуу хоолойг давхар илэрхийлэн дамжуулах зорилтот аялал 20 гаруй хоногийн хугацаанд үргэлжилнэ. Дугуй, цанаар хичээллэж, Хойд туйлын аяллын үндсэн бэлтгэлээ базаасан Гавьяат тамирчин Г.Өсөхбаяр Хойд туйлыг зорих бэлтгэлээ Улаанбаатар хотоос гадна Өвөрхангай, Хөвсгөл аймагт хийж, өнгөрсөн хугацаанд Өвөрхангай аймгийн Улаанцутгалан хүрхрээнд авирч /мөсний авиралт/, Хөвсгөл далайн мөсөн дээр анх удаа 160 км-ын өвлийн дугуйн аялал хийсэн байна.

-    Бэлтгэл хэр хангагдсан бэ?

-    Энэ аялал миний олон жилийн хөдөлмөр, сургуулилтын үр дүнг гаргана. Маш олон хүний дэмжлэг тус дэмээр энэ аялал бүтэж байгаа. Сэтгэл зүй болоод биеийн бэлтгэлээ бүрэн хангасан байгаа.

-    Энэ авиралтын өмнө туршилт болгоод хамгийн өндөр аль ууланд авирсан бэ?

-   Хойд Америкийн хамгийн өндөр цэг болох Аляскагийн ууланд авирсан. Тэр ууланд энэ аялалтай төстөй аялал явагддаг. Тэр авиралтаас маш сайн туршлага суусан байгаа.

-    Та ямар хүмүүстэй баг болж гарах вэ?

-    Монголоос бол ганцаараа. Америк, Португал, Австариийн гэсэн найман хүнтэй нэг баг болж аялна. Багынхантайгаа Норвегт уулзана. Тэгээд цаашаа явна.

-    Энэ аялал нь томоохон авиралт гэж ойлгож болох уу?

-   Тэгэж хэлж болно. Мэдээж энэ аялал бол дэлхийн хэмжээний томоохон хүнд аялалуудын нэг. Өөртөө 100 хувь итгэлтэй байгаа.