2000 оноос хойш сургалтын төрийн сангийн зээлээр гадаадад 6749 хүнийг бакалавр, магистр, докторт суралцуулсан байна. Зөвхөн 2010-2011 онд улсын төсвөөс 5,3 тэрбум төгрөгийг зарцуулжээ. Гадаадад суралцагчдын 10 орчим хувь нь зээлээ эргүүлэн төлсөн байна. Тиймээс гадаадад төрийн сангийн зээлээр төгссөн төгсөгчдөөс зээлийг нь эргүүлэн төлүүлэх ажлыг Боловсрол, шинжлэх ухааны яамнаас эхлүүлээд байгаа аж.  Төрийн сангийн зээлээр гадаад улсад суралцсан төгсөгчид эх орондоо ирж ажилладаггүй, төрийн сангийн зээлээ эргэн төлөөгүй  зэрэг асуудлыг өмнө нь Ерөнхий сайд асан С.Батболд хөндөж байсан. Өөрөөр хэлбэл энэ хүмүүсээр зээлийг нь төлүүлэх ёстой хэмээж байсныг та бүхэн санаж байгаа байх. Харин энэ асуудал энэ засгийн үед сэдэрч одоогийн Ерөнхий сайд Н.Алтанхуягийн тушаалаар зээлээ төлөөгүй төгсөгдчийг хайж эхэллээ. Хэрэв зээлээ төлөхгүй бол өөрийн орон сууцыг нь хурааж, нэрсийг нь зарлахаар бэлтгэж байгаа юм байна.  Энэ шийдэл нь манай улсын эдийн засаг хүндэрч байгаатай холбоотой. Түүнчлэн, зээл авсан хүмүүсийн ихэнх нь дарга нарын хүүхэд байдаг  хэмээн баттай эх сурвалж мэдээллээ.