АНУ-ын иргэн Жон Мартин Кийнийг хөнөөсөн 24 настай Ч.Баттуул нарын хэргийг нэмэлт мөрдөн байцаалтад буцаалаа. Учир нь шүүх бүрэлдэхүүн хэргийг хянан үзээд, мөрдөн байцаалтын явцад тодруулах зүйл их байна гэсэн үндэслэлээр хэргийг дахин шалгуулахаар болсон байна. Ч.Баттуул нь найз Ж.Батчулуун, Б.Отгонбаяр нарын хамт шүүгдсэн билээ. Тэднийг Эрүүгийн хуулийн тусгай ангийн 91.2.1, 91.2.3, 91.2.6, 91.2.12 зүйл ангиар буруутгаж буй. Хуралд шүүгчээр Д.Ганзориг, С.Аюушжав, Б.Батболор, Улсын яллагчаар Б.Эрхэмбаяр, өмгөөлөгчөөр К.Бауржан, А.Ариунтуул, Л.Данзанноров нар оролцов.
Хурлыг нэмэлт мөрдөн байцаалтад буцаахад Ч.Баттуулын өмгөөлөгч Ч.Баттуулыг батлан даалтад гаргах хүсэлт гаргасан боловч шүүх бүрэлдэхүүн хүлээн авсангүй.
Ч.Баттуул нь ШШГЕГ-ын харьяа цагдан хорих 461 дүгээр ангид жил гаруй хугацаанд хоригдож байгаа юм. Харин Ж.Батчулуун, Б.Отгонбаяр нар нь гадуур байцаагдаж байгаа бөгөөд эмэгтэй нь өдгөө зургаан сартай жирэмсэн аж.
Хэргийг сануулбал, өнгөрсөн оны нэгдүгээр сарын 5-ны өдөр манай улсын хилээр орж ирсэн Америк иргэн Жон Мартин ор сураггүй алга болжээ. Монголд бизнес эрхлэхээр явсан хүүгийнх нь өмнөөс Ч.Баттуул хоёр сарын турш завгүй байгаа хэмээн хариулж байсанд эх нь сэжиг авч Монгол дахь АНУ-ын элчин сайдын яамд эрэн сурвалжилж өгнө үү хэмээх хүсэлт тавьжээ. Талийгаачийн цогцсыг гуравдугаар сард Төв аймгийн Эрдэнэ сумын нутаг, Цонжин болдгийн орчмоос олсон юм.
Шүүгдэгч Ч.Баттуул “Жон Мартин Кийнийг ирсэн өдрийнх нь маргааш буюу нэгдүгээр сарын 6-ны өдөр хөнөөсөн. Зургаан удаа буудсан. Түүнийг Эрдэнэ сумын нутагт аваачиж амь насыг нь бүрэлгээд хэргээ нуухын тулд цогцсыг нь булсан” хэмээн мэдүүлсэн байдаг.
Харин Ж.Батчулуун, Б.Отгонбаяр нар “Найз маань хүн алчихлаа. Туслаач гээд гуйгаад байхаар нь цогцсыг зөөлцсөн” хэмээн мэдүүлж байв.
Б.Чимэг
Сэтгэгдэл (14)