Монголын томоохон аялал жуулчлалын "Женко тур" компанийн жуулчлалын хөтөлбөрийн дагуу  аялахаар явсан иргэд Солонгос улсад саатуулагджээ. Тэднийг Солонгосын Чежү арлын шалган нэвтрүүлэх газрын саатуулах байранд 30 гаруй цаг саатуулжээ гэх мэдээлэл цацагдаад байгаа. Тодруулбал, энэ сарын 2-нд Чежү арлыг зорьж, аялахаар явсан манай улсын долоон иргэнийг хоол унд өгөхгүй, ямар ч агааржуулалтгүй, бохир, цонхгүй өрөөнд саатуулсан бөгөөд Солонгосын ЭСЯ-ны Консулын газарт үүрэг өгч ажиллаж байгаа аж. Эдгээр иргэдийг саатуулсан шалтгааныг Чежү арлын шалган нэвтрүүлэх газраас тус улсад орох эрх нь хязгаарлагдсан аяллын зорилго нь тодорхойгүй байсан хэмээн саатуулсан гэдгээ мэдэгдсэн.

     Ингээд "Женко тур" компанийн ажилтнаас энэ талаар асууж тодруулахад "Энэ мэдээлэл бол ташаа мэдээлэл. Бид холбогдох газар яамдуудад албан бичгээр няцаалт өгч байгаа. Манай аялагчдаас хил дээр саатуулагдаж байгаа нь үнэн. Гэхдээ долоон хүн биш. Яг хэдэн хүн хоригдож байгааг нь хэлэх боломжгүй. Удахгүй хэвлэлийн бага хурал хийж энэ талаар залруулна" гэлээ.  Ямартаа ч түүний ярианаас "Женко тур" компанийн аялагчдаас хил дээр саатуулагдаад байгаа нь тодорхой боллоо.

    Харин Гадаад харилцааны яамны консулын газраас энэ талаар тодруулахад, "Солонгосын Чежү арлын шалган нэвтрүүлэх газрын саатуулах байранд манай долоон иргэн саатуулагдаад байгаа нь үнэн. Эдгээр иргэдийг Солонгосын тал манай улсад орох эрх нь хязгаарлагдсан,  аяллын зорилго нь тодорхойгүй байсан хэмээн саатуулсан. Энэ асуудлыг хүлээж аваад манайхаас Сөүлийн элчин сайдын яам руу хандаад байна. Манайхаас хоёр хүн тус Чежү арлын шалган нэвтрүүлэх газар руу нөхцөл байдалтай танилцахаар явсан.  "Женко тур", "New Juulchin", "Жуулчин" компаниуд руу албан бичиг хүргүүлээд байна. Тэнд байгаа хүмүүсийн биеийн байдал болоод өөр дэлгэрэнгүй мэдээлэл одоохондоо бидэнд алга" гэсэн юм.