Дэлхийн бүжгийн холбооны конгрессийн гишүүн, “Гоолингоо” клубын захирал, МУГЖ Б.Бэхбатын тухай 24 баримтыг хүргэж байна. Дэлхийн бүжгийн холбооны конгрессийн гишүүн, “Гоолингоо” клубын захирал, МУГЖ Б.Бэхбатын тухай 24 баримтыг хүргэж байна.
1.Бүжигчин Бэхбат айлын өргөмөл хүүхэд. Түүний өргөсөн аав Төв аймгийн Цагдаагийн хэлтэст аж ахуйн албаны даргаар ажиллаж байхдаа аав, ээжтэй нь танилцаж Бэхбатыг өргөж авсан гэдэг. Д.Бэхбатын угаасан ус нь Төв аймаг, өссөн нутаг нь Өмнөговь юм.
2. МУГЖ Д.Бэхбатын өөрийн аав ээж нь хүүхэд гаргаад тогтдоггүй айл байсан гэдэг. Харин өргөсөн аав, ээж нь нэг хүүхэд гаргаад алдсан учраас хоёр талаасаа ярилцан Д.Бэхбатыг үрчилж авчээ.
3. Д.Бэхбат багадаа цовоо цойлгон шүлэг уншиж, дуу дуулах, бүжиг зохиогоод бүжиглэчихдэг авьяастай хүүхэд байж. Тэрээр айлын ганц хүүхэд байсан болохоор их уйддаг байснаа хожим нь дурсан ярьжээ. Хааяа аав, ээжийгээ хот руугаа буцья хэмээн сандаргадаг байж. Аргаа бараад аав, ээж нь наснаас нь өмнө сургуульд оруулсан гэдэг.
4.Хүүхэд байхдаа тоо, хими, физикийн хичээлээс тойрч соёлын ордонд ирсэн тоглолтыг алгасахгүй үздэг байж. Д.Бэхбат Пионерийн анхдугаар зөвлөлгөөнөөр “Цацал” бүжиг бүжиглэн анхныхаа алтан медалиа хүртжээ.
5. Тэрээр Алиа Данзангийн тоглолтыг үзсэнийхээ дараа “Ардын жүжигчин Данзан”-д гэж хаяглан бичсэн захиандаа, “Ээж минь ч бүжгийн сургуульд явуулья гэхгүй. Аав маань ажлаа хийгээд хилийн заставаар яваад өгчихнө. Би бүжигчин болох чин хүсэлтэй. Бүжигчин болоход минь та туслаач” хэмээн захиа бичсэн аж. Гэнэт нэг өдөр түүнд Алиа Данзангаас захиа, чихрийн цуглуулга иржээ. Тэрээр захиандаа, “Их ирээдүйтэй хүүхэд байна. Би ч гэсэн чам шиг хүсч мөрөөдөж байж жүжигчин болсон. Чиний хүсэл мөрөөдөл биелнэ. Хот орж ирвэл заавал надтай уулзаарай” гэж бичжээ.
6. Д.Бэхбат 10 дугаар ангиа төгсөөд Цэргийн дуу бүжгийн чуулгад шалгуулан тэнцэж урлагийн алтан замд эргэлт буцалтгүй орсон гэдэг.
7.Улсын гавьяат жүжигчин Д.Нанжидын дэглэл Мэнд-Амарын хөгжим “Баатар Бор” бүжиг түүнийг МУГЖ болгожээ. 30 нас хүрээгүй байхдаа МУГЖ болсон аж. Түүнд “Өмнөговь аймгийн улсын баатар эмэгтэйн дүрийг гаргана гэдэг тийм ч амар байгаагүй гэнэ. Дотоод сэтгэлээ гаргаж бүжиглэх гэж нэлээн хичээжээ. Тухайн үед ээж нь нас барчихсан хүнд үе байсан аж. Дээр нь зүүн хөлөндөө гэмтэл авч бүжиглэхдээ новикайн тариулж байснаа ярилаа.
8.Тэрээр МУГЖ болсныхоо дараа гадагшаа сургуульд явья гээд Соёлын яаманд өргөдөл өгчээ. Яг энэ үеэр “Ацаг шүдний зөрүү” киноны Сэндэр хатны дүрийн пробонд ороод тэнцчихэж. Тэгээд “Би кинонд тоглоно сургуульд явахгүй” гэхэд Соёлын яамны ажилтан Балчиндорж сургуульд явахад нь ташуур өгч, Сэндэр хатны дүрд өөр хүн тоглохоор болсон гэдэг.
9. Бүжигчин маань 30 насандаа зургаан жил оросын аугаа их урлагаас суралцжээ.
10.Түүний хүндэлж биширч явдаг хүн нь зууны манлай бүжигчин, балетчин Ю.Оюун асан. Ю.Оюуныг ардын жүжигчин болж байхад нь тэрээр гавьяат авчээ.
11. Д.Бэхбатынх Өмнөговиос шилжиж ирээд 40 мянгатад суурьшжээ. Түүний хань чөлөөт бөхийн тамирчин байжээ.
12.Зах зээлийн шилжилтийн үед урлагийнхан нэлээн ганхсан.Энэ үед Д.Бэхбат Өмнөговь аймгийн Хөгжимт драмын театрт хоёр жил бүжгийн багшаар дараа нь хотод шилжин ирж СУИС-д хоёр жил багшилсан байна. Зах зээлийн шуурганд мэргэжлээ орхиогүйгээ хойно сурсны хэрэг хэмээн тэрээр тодорхойлжээ.
13. Оюутан байхдаа усан сэлэлтийн хичээл дээр тааруухан үнэлгээ авдаг байж. Учир нь говийн хүүхэд болохоороо уснаас их айдаг байсан аж. Усанд сэлэлтийн багш нь шалгалт авч “Монголька иди сюда” гэжээ. Бассейнд хаана нь гүехэн байна хэмээн урьдчилсан судалгаа хийж байгаад үсэрч орхиж. Нэг харсан хүмүүс тойроод зогсчихсон. Хажууд носилька байжээ. Үүнээс болж усан сэлэлтийн багш нь нэлээн банга хүртсэн гэдэг. “Бассейнд битгий яваарай. Чи бүжгийн аэробект явна шүү” гэж. Ийнхүү усан сэлэлтийн хичээлээс бүр мөсөн чөлөөлөгджээ.
14. Дээрх явдлаас болж бүжгийн аэробект явах болсон нь шилжилтийн үед түүнд их хэрэг болсон гэдэг. Залуучуудын соёлын төвд цагаар аэробек зааж СУИС-д авч байсан цалингаа нэг нугалжээ.
15.Тэрээр “Гоолингоо” клубыг 17 жилийн өмнө байгуулсан. Энэ хугацаанд “Гоолингоо” клуб дардан замыг туулаагүй аж. Аэробек маягийн бүжгийн хөдөлгөөнөөр хүүхдүүдийг сургаж бүжгийн дугуйлан байгуулья гэж анх нээсэн нь талаар болж, Үйлдвэрлэл дизайны сургуулийн оюутнууд болон загвар өмсөгчдөд дасгал зааж эхэлжээ. Энэ нь үр дүнгээ өгөөгүй гэдэг. Тэрээр биеийн тамирын ном цуглуулан тамирчдыг судалж эхлэв. Эл судалгаа нь хожим нь жин хасах эрүүлжүүлэх төв болоход нь дөхөм болжээ.
16.Одоо түүний хоёр охин нь “Гоолингоо” клубыг нь ажиллуулж байна. Хоёр охин нь ээжийнхээ мэргэжлийг өвлөжээ.
17.Түүний амьдрал дардан байсангүй. Амьдралын шуурганд ханилсан хань нь бор дарс хэрэглэн хоёр тийш болохоос өөрцгүй байдалд хүрсэн гэдэг. Тэр үед бага охиноо дагуулан цүнх үүрэн сургуулийн зааланд дасгал зааж хэдэн төгрөг олдог байснаа нэгэн удаа дурссан байдаг.
18. “Гоолингоо” яагаад бусад клубээс илүү хүн татаад байдаг юм бол гэсэн асуултад тэрээр “Сайн бүжигчин байснаараа бүжгийн багш хийж чаддаггүй. Багш гэдэг бол программаа боловсруулахаас гадна хүнийг сургаж чаддаг байх ёстой” хэмээн хариулжээ.
19. Эмэгтэйчүүдэд зориулсан “Сайхан байхын нууц” нэртэй номоо тэрээр таван жилийн судалгаан дээр тулгуурлан бичжээ. Сүүлийн арав гаруй жил хүний биеийн бүтэц болон бодисын солилцоог сайжруулах, биеийн энергийн зарцуулалт, галбирыг зөв тогтоож өгөхөд хүн эрүүлжихээс гадна хөдөлгөөнд орж илүүдэл жингээ хасдаг болохыг туршлагаар олж мэдсэн байна.
20.Тэрээр гурван охин нэг хүүтэй. Түүний хайртай хүү нь Солонгост ажиллаж байхдаа үйлдвэрийн осолд орж бүтэн жил Солонгосын эмнэлэгт тэр сахиж хөл дээр нь босгосон ачтай ээж. Хүүгээ хоёр сар ухаангүй байхад нь баруун чихэнд нь “миний хүү хэзээ ч хүний нутагт ээжийгээ битгий орхиорой. Хүний нутагт ээжийгээ орхихгүй цагт чиний зүрх сэтгэл чинь надтай хамт байна. Ээж нь хүүгээ хүлээж байна шүү гэж” шивнэдэг байж. Тухайн үед би ингээд залбираад байвал мөнх тэнгэрээс нэг од шүүрэх юм биш байгаа гэж бодож байжээ.
21.Түүнийг ойр орчмынх нь хүмүүс “Хайр нь дотроо хал нь гаднаа хүн” гэж үнэлдэг юм билээ.
22.Өөрийгөө ямар хүн гэж дүгнэх вэ гэсэн асуултад тэрээр “Өөрийгөө дүгнэх хэцүү л дээ. Миний хувьд хүн ухаантай, зарчимч, хийсэн ажилдаа үнэнч байх ёстой гэж боддог” гэв.
23.Монголын бүжгийн урлаг хувьсаж даяарчлагдаж байна. Маш их хувьсаж байна Сүүлийн үед бүжиг цирк, гимнастик ч болж байх шиг хэмээн сэтгэл дундуур байдаг тухайгаа ний нуугүй хэлсэн юм.
24. Тэрээр найман жилийн өмнө Дэлхийн бүжгийн холбооны конгерресийн гишүүнээр элсжээ. Цветкова Лариса Юривна багш нь дэмжиж холбоонд элсэхийг зөвлөсөн байна.
Б.Аяз
Сэтгэгдэл (17)