Монголын улс төрийн шилдэг зүтгэлтэн С.Зориг агсаны хөшөөг 15 жилийн өмнө бүтээсэн. С.Зориг сэрүүн тунгалаг байсан бол энэ сарын 20-нд 51 нас хүрэх байлаа. Өнөөдөртэй харьцуулахад хамаагүй ядуу ч үнэт зүйл, эрхэмлэх зорилготой байсан гэгээн цагийн билгэдэл болсон энэ хүнээс бидэнд хөшөө нь л үлджээ.


  С.Зориг хэзээ тамхинд орсон талаар яг тэдийд гэсэн мэдээлэл байддаггүй. Тэрээр тамхиа татангаа ном унших, шатар нүүх тун дуртай байв. Голдуу Болгарын “Стюардесс” хэмээх янжуур татна. Тиймээс ч түүний хөшөөг тамхи барьж, бодол болон зогсож байгаагаар бүтээжээ. Одоо түүний хөшөөний өмнө хааяа “Стюардесс” янжуурыг тавьсан байдаг.

Гэтэл саяхнаас түүний хөшөөний тамхийг тайрсан тухай мэдээлэл хэвлэлээр гарч эхлэв.  Ардчилсан намынхан С.Зориг агсны тамхи алга болсон талаар сая л мэдсэн бололтой. Учир нь тэд хэргийн этгээдийг хайж эхэлсэн гэнэ. Яг нэг жилийн өмнө буюу 2012 оны дөрөвдүгээр сарын 20-ны өдөр С.Зориг агсаны хөшөөнд АН-ынхан болон зарим улс төрийн зүтгэлтнүүд хүндэтгэл үзүүлсэн. Энэ үеэр тэдний нэг нь ч тайрсан тамхийг олж хараагүй нь сонин. Бүр зарим нь "Тамхины хяналтын тухай хууль" яригдаж эхлэх үеэр алга болсон гэж сэжиглэж байх юм.

Уг нь өнгөрсөн есдүгээр сард Ерөнхийлөгч, Ерөнхий сайд, УИХ-ын дарга, Хотын дарга, УИХ-ын гишүүд сүр дуулиантай ирж түүний хөшөөнд хүндэтгэл үзүүлсэн. Ингэхдээ ч анзаараагүй гэдэг нь бас л сонин.