Улаанбаатар хотын авто замын ачааллыг бууруулж, түгжрэлийг багасгах зорилгоор нийслэлийн зүгээс хэд хэдэн томоохон ажлыг хийгээд байгаа ч машины тоо жилд 22,4 хувиар нэмэгдэж байгаа нь замын ачааллыг нэмэгдүүлж, түгжрэлийг үүсгэсээр байгаа юм. Тиймээс 173 байршлын авто замын саадыг арилгаж, хорооллын дотор шинээр 103,460 метр квадрат замыг байгалийн чулуугаар барихаар болжээ. Бусад байршилд 25,8 км авто замыг шинээр барьснаар 85 уулзвар замыг нээх юм байна.  Байгалийн чулуугаар авто зам тавих нь өртөг хямд, нэг удаагийн хөрөнгө оруулалтаар барьсан тохиодолд байнгын засвар арчлалтын зардлыг хэмнэх боломжтой, өнгө загварын хувьд орчны байдалтай сайн зохицдог, авто машинууд хурдаа сааж явах тул осол аваар багатай, түүхий эд материалыг дотоодтоо үйлдвэрлэх боломжтой зэрэг олон давуу талтай юм байна.

Мөн Нийслэлийн таван дүүргийн авто замын саадыг арилгаж, шууд нэвтрэх боломжтой болгох юм байна. Тухайлбал, Баянгол дүүргийн 1-9 дүгээр хороонд шинээр 27,597 метр квадрат авто зам тавьж 51 саадыг арилгах аж. Чингэлтэй дүүрэгт 1-6 дугаар хороонд нийтдээ 8 428  метр квадрат зам тавьж, 12 замын саадыг арилгаж нийтдээ нийслэлийн таван дүүргийн 35 хороонд 103,460 метр квадрат авто замыг барих юм байна. Өөрөөр хэлбэл Чингэлтэйгээс Баянгол, Баянголоос Сүхбаатар дүүрэг хүрэхийн тулд заавал олон замаар тойрч явахгүйгээр шууд очих боломжийг нээх юм.

Ингэснээр замын хөдөлгөөний ачаалал 20 гаруй хувиар буурна гэж тооцжээ.

Удирдлагын зөвлөлийн гишүүд энэ асуудлыг хэлэлцээд энэхүү төслийн хөрөнгийн асуудлыг холбогдох байгууллагуудтай хамтран яаралтай шийдвэрлэж, төслийг хэрэгжүүлэх бүтээгдэхүүний үнийн санал, судалгаа гаргахыг Нийслэлийн хөрөнгө оруулалтын газарт үүрэг болгосон юм. Хөрөнгийн асуудлыг эцэслэн НИТХ-ын Тэргүүлэгчдийн хуралдаанаар шийдвэрлэх юм.