Монголын томоохон аялал жуулчлалын "Женко тур" компанийн жуулчлалын хөтөлбөрийн дагуу  аялахаар явсан иргэд Солонгос улсад саатуулагдсан билээ. Тэднийг Солонгосын Чежү арлын шалган нэвтрүүлэх газрын саатуулах байранд 30 гаруй цаг саатуулжээ гэх мэдээлэл цацагдаад байгаа. Тодруулбал, энэ сарын 2-нд Чежү арлыг зорьж, аялахаар явсан манай улсын долоон иргэнийг хоол унд өгөхгүй, ямар ч агааржуулалтгүй, бохир, цонхгүй өрөөнд саатуулсан бөгөөд Солонгосын ЭСЯ-ны Консулын газарт үүрэг өгч ажиллаж байгаа аж. Эдгээр иргэдийг саатуулсан шалтгааныг Чежү арлын шалган нэвтрүүлэх газраас тус улсад орох эрх нь хязгаарлагдсан аяллын зорилго нь тодорхойгүй байсан хэмээн саатуулсан гэдгээ мэдэгдсэн.

     Ингээд "Женко тур" компанийн ажилтнаас энэ талаар тодруулахад "Энэ мэдээлэл бол ташаа мэдээлэл. Бид холбогдох газар яамдуудад албан бичгээр няцаалт өгч байгаа. Манай аялагчдаас хил дээр саатуулагдаж байгаа нь үнэн. Гэхдээ долоон хүн биш. Манай компаний шугамаар явсан хоёр хүн саатуулагдсан.  Удахгүй хэвлэлийн бага хурал хийж энэ талаар залруулна. Тэдний саатуулагдаж байгаа газрын тухайд ямар ч хүний эрхийг зөрчих хэмжээний хүнд нөхцөлд байлгаагүй гэсэн. Энгийн нөхцөлд хоол цай болон бусад  зүйлсээр хангагаж байгаа" гэлээ. 

    Харин Гадаад харилцааны яамны консулын газрын захирал Ш.Сүхбаатар, "Солонгосын Чежү арлын шалган нэвтрүүлэх газрын саатуулах байранд манай долоон иргэн саатуулагдаад байгаа нь үнэн. Эдгээр иргэдийг Солонгосын тал манай улсад орох эрх нь хязгаарлагдсан, аяллын зорилго нь тодорхойгүй байсан хэмээн саатуулсан. Энэ асуудлыг хүлээж аваад манайхаас Сөүлийн элчин сайдын яам руу хандаад байна. Манайхаас хоёр хүн тус Чежү арлын шалган нэвтрүүлэх газар руу нөхцөл байдалтай танилцахаар явсан.  Мөн  "Женко тур", "New Juulchin", "Жуулчин" компаниуд руу албан бичиг хүргүүлээд байна. 
  Тэднийг энэ сарын 6-нд эх орондоо ирнэ хэмээн эх сурвалж өгүүллээ.