МАН-ын гишүүд Ерөнхийлөгч Ц.Элбэгдоржийг үг хэлэнгүүт чуулганыг орхин гарсан. Тэд чухам ямар шалтгаанаар чуулганыг орхин гарсан талаар ийн ярьлаа.

УИХ дахь МАН-ын бүлгийн дарга Н.Энхболд: Улс орны эдийн засаг нийгмийн амьдрал доройтож хүмүүсийн цалин тэтгэмж нэмэгдэхгүй байна. Юмны үнэ нэмэгдэж байгаа. Хамгийн гол нь хууль тогтоомж мөрдөгдөхгүй, эрх баригчид нь дураараа аашилж байна. Тийм ч учраас ард түмэнтэйгээ ярилцая хэмээн тэр хуралдааныг хаяад гараад ирлээ.

   -УИХ-ын гишүүн Ц.Нямдорж: 90 оны үйл явдлаас хойшхи 23 жилийн хугацаанд МАН дангаараа хоёр удаа засаг барьсан. АН нэг удаа засаг барьсан. Үлдсэн хугацаанд хамтарч засаг барьсан. Нийт дүнгээрээ энэ 23 жилийн 13 орчим жил дангаараа засаг барих юм уу, хамтарч засаг барих үйлд АН оролцож байсан. Тийм байж улс оронд болж буй бүх юмны болохгүй байгаа зүйлийг өөрсдөө засаг барьж байгаагүй юм шиг яриад эхлэхээр нь тэнд сууж байх шаардлагаггүй болсон. Ц.Элбэгдорж хоёр удаа Ерөнхий сайд болсон. Одоо Ерөнхийлөгч болоод бүрэн эрхийн хугацаа нь дуусч байгаа. Тэгтэл үүнийгээ мартчихаад дайраад эхлэсэн. Бидэнд дэмий юм сонсож байх шаардлага байхгүй.

МАН-ын дарга Ө.Энхтүвшин: Улс төрийн тэмцэл бол ямар ч хэлбэртэй байж болно. Тиймээс бид нөхцөл байдлыг харж байгаад чуулганы хуралдааныг орхилоо. Учир нь УИХ-ын даргын хэлж байгаа үг мөн Ерөнхийлөгчийн хэлж буй зүйл Монголын амьдралтай эрс зөрж байна. Тухайлбал, амьдрал сайхан болж, төр төлөвшиж байна. Хууль цаазтай улс бий боллоо. Шударга шүүхтэй болсон гэх мэт яриаг бид сонсоод байх шаардлагагүй. Тэнд худал үг сонсож байснаас, энд ард түмэнтэйгээ ярилцсан нь дээр гээд гараад ирлээ.

УИХ-ын гишүүн Д.Лүндээжанцан: Алдаа оноо аль алинд нь байхад нэг нэгийгээ доош нь хийх нь зохимжгүй. Иймээс МАН болон МАХН-ын гишүүд  Ерөнхийлөгчийн хэлсэн үгийн зарим хэсэгтэй нь санал нийлэхгүй байгаа учраас гарсан гэж би ойлгож байна.