Зууны манлай дуучин, поп хатагтай Б.Сарантуяагийн төрсөн өдөр тун удахгүй болно. Тэрээр төрсөн өдрөө зөвхөн ойрын хүрээлэл дотроо чимээгүйхэн тэмдэглээд өнгөрдөг нэгэн биш. Өөрийн сонсогч фенүүдтэйгээ сүр дуулиантай тэмдэглэдэг уламжлалтай. Өөрөө хэлбэл, дуучин маань төрсөн өдрөөрөө Б.Сарантуяаг гэх сэтгэлтэй, түүнийг дууг сонсож өссөн, одоо ч сонссоор байгаа тэр л олонд бэлгээ барьдаг. Харин энэ удаа түүний  фенүүддээ барьсан бэлэг бол үнэхээр онцгой, хэзээ ч мартагдашгүй, нэгэн үеийн түүхийг агуулсан тийм л бэлэг байлаа. Энэ бол 27 жилийн түүхтэй гэрэл зургийн үзэсгэлэн юм. 27 жил урлагт зүтгэж, урлагийн түүхийг бичилцэж, хөгжмийн ертөнцөд үнэтэй хувь нэмэр оруулсан поп хатагтайн гэрэл зургийн үзэсгэлэнд сэтгүүлч миний бие хэсэг хором саатсан юм. Намайг очиход түүний үзэсгэлэнг сонирхосон хүмүүсээс залуучууд нь давамгайлсан байлаа. Харин хэсэг хугацаа өнгөрөхөд фенүүдээс нь түүний үзэсгэлэнг зорьж ирэх нь улам ихэссэн юм.  Ингээд уншигч та бүхнийг  “Амьдрал намайг дуунд уяраажээ 27 жил Урлагийн тайзнаа” нэртэй түүх агуулсан ховорхон зургийн ертөнцөөр аялуулъя.