Шинэчлэлийн гэх сүржин нэртэй Засгийн газар “Сайд” нарын гэх тодотголтой Клиникийн нэгдсэн II эмнэлгийг хоригдлуудын эрх ямба эдэлдэг эмнэлэг болгосноо нүдээ олсон шинэчлэл хэмээн тун ч их маадгар байна.
    Шинэчлэлийн гэх сүржин нэртэй Засгийн газар “Сайд” нарын гэх тодотголтой Клиникийн нэгдсэн II эмнэлгийг хоригдлуудын эрх ямба эдэлдэг эмнэлэг болгосноо нүдээ олсон шинэчлэл хэмээн тун ч их маадгар байна. Угтаа бол нүдээ олсон биш харин ч сохолсон хэрэг болсон гэдгийг олон түмэн дүгнэж байгаа.

    “Сайд” нарын гэх тодотгол нь хүмүүсийн энэ эмнэлэгт хэвтэн эмчлүүлэх хүслийг төрүүлдэг байсан. Гэтэл салбарын сайдын намын даргаа бодсон явцуу шийдвэрээс үүдэн өнөөдөр энэ эмнэлэгт төрийн өндөр албан тушаалтан буюу хоригдол гэсэн нийгмийн хоёр давхаргынханэмчлүүлэх болчихоод байна. Нийгмээс тусгаарлагдаж эрхээ хасуулан хүмүүжиж буй хүн нийгмийн өндөр зэрэглэлд хамрагдах болсон нь урт шар дээлт Н.Энхбаярын ач. Хүсээд байсан нөгөө эмнэлэгт хамгийн муу муухай бүхнийг хийж, нийгмийг бараантуулж байдаг хоригдлууд хэвтэн эмчлүүлэх үүд хаалга дэлгээстэй болсныг ард түмэн сонсоод мэл гайхаж, цэл хөхрөхөөс гадна битүүхэндээ зэвүүцэж байв.

    Мэдээж гайхахад багадна. Төрийн гурван өндөрлөг энэ эмнэлэгт хэвтэн эмчлүүлэх эрх нь ийнхүү ядмагхан бодолтой сайдын шийдвэрээр боогдож байгаа нь нөгөө шинэчлэл хийхээр улайрч байгаа Н.Алтанхуягийн кабинетийнхан хөлөө олохгүй эрх мэдэлдээ элийрч байгаа дүр зургийн илрэл юм. Угтаа бол Эрүүл мэндийн сайн Н.Удвал төрийн хэдэн өндөрлөгүүдийг басамжилж байгаа хэрэг. Гэтэл үүнийг дэмжиж, шийдвэр гаргахад нь нүдээ аниад чихээ тагласан Ерөнхий сайд Н.Алтанхуяг ямар ч тайлбар хийлгүй харин ч дэмжсэн маягтай байна билээ. Тэрбээр өөрийнхөө эрүүл мэндээс илүүтэйгээр албан тушаалаа тэргүүн эгнээнд тавьжээ. “Өвчин хэлж биш хийсч ирдэ”г гэдэг ардын мэргэн үгийг манай эрхэм Ерөнхий сайд маань мартсандаг. Хэрвээ өвчин зовлон тохиолдвол хаана эмчлүүлэх эсэхээ урьдчилан тооцоолоогүй л юм байхдаа хөөрхий.  Магадгүй сайдын суудалд арай ядан тогтож л  байвал гадаад руу нисч очоод өдөрт нь эмчлүүлнэ гэж мөрөөдсөнөөс зайлшгүй.

    Анх Шинэчлэлийн Засгийн газар бутарна, задарна хэмээн МАХН-ын хэдэн гишүүнТөрийн ордонд үймээн тарьж, Ерөнхий сайд Н.Алтанхуягийг хоол унднаас гартал нь сандаргаад. Гэвч энэ дуулиан гэнэт намжиж, Эрүүл мэндийн сайд Н.Удвал намын дарга Н.Энхбаярыгаа Клиникийн нэгдсэн II эмнэлэгт хэвтэж эмчлүүлэх шийдвэрийг Хууль зүйн сайд Х.Тэмүүжинтэй хуйвалдаад гаргачихсаныг нь хэн ч эсэргүүцэж чадалгүй өнгөрсөн нь Н.Алтанхуягийн нөмөр нөөлөг үйлчилсэнтэй холбоотой гэдэг. Угтаа бол Прокурорын ерөнхий газрын хэдэн прокурор нь ээлж дараалан “Н.ЭнхбаярII эмнэлэгт хэвтэн эмчлүүлэх боломжгүй. Хэрвээ ийм шийдвэр гаргавал хууль зөрчсөн хэрэг хэмээн” ам уралдан ярьж байсан.

    Гэтэл тэр их мэдэмхийрч яриад байсан нөгөө хэд ч таг чиг. Арга ч үгүй биз дээ. Ерөнхий сайд нь салбарын сайдтайгаа хамт тэднийг нүдээ аниад чихээ таглаад өнгөрөөх лүндэн буулгасан юм хойно дуугүй байх нь зөв сонголт болсон. Ингээд л нөгөө нэг Н.Энхбаяр Зайсан дахь 401 дүгээр хорих ангиас Сайд нарын гэх тодотголтой эмнэлэгт тусгайлан бэлдсэн өрөөнд тухалж тун ч их монцгор суугаа юм билээ. “Тусгай” гэдэг нэрнээсээ салж ялтнуудын оромж болоод сар гаруйн хугацаа өнгөрч, харин эмнэлгийн эмч ажилтнууд нь хүртэл ажлаа хийхэд хүндрэлтэй, айдас дунд бэмбэгнэдэг болсноо удаа дараа хэлж байсгныг тоосон нэг ч эрх мэдэлтэн байсангүй.

    Сүүлийн хэдэн өдөр хаврын чуулган нээлтээ хийж, хажуугаар нь С.Баярцогтын Швейцарын банк дахь хадгаламж нь илэрч, бас болоогүй Монголыг БНХАУ-ын хэмээн дэлхийд тунхаглаж, түүнийхээ залруулгыг хийх гэж үйл тамаа үзэж байх энэ үед Н.Энхбаярын асуудал дутахгүй намчирч байна. Харин сэтгүүлч миний бие үнэхээр эмч мэргэжилтнүүд ажлаа хийхэд хүндрэлтэй, өвчтөнүүд айдас дунд байгаа эсэхийг мэдэхээр Клиникийн нэгдсэн II эмнэлэг рүү зорьсон юм.

    Намайг очиход нам жим, эмнэлгийн ажилч хэвийн үргэлжилж байсан юм. Харин МАХН-ын дарга Н.Энхбаярын талаар асуухад хүн болгон цэрвэж, “дуугүй байсан нь дээр байх аа. Ажилтайгаа л байвал...” гэсэн үгийг хэлж байсан юм. Харин зарим хүмүүс өөрийн үзэл бодлоо илэрхийлсэн бөгөөд нэрээ нууцлахыг хүссэн юм.

Клиникийн нэгд¬сэн II эмнэлгийн сувилагч Б:

-МАХН-ын дарга Н.Энхбаяр танайд хэвтэн эмчлүүлээд  сар гаруйн хугацаа өнгөрчээ.  Ямар нэгэн асуудал гарав уу?

-Анх ажил төрөл явуулахад маш хэцүү байсан. Энд тэндгүй хамгаалалтын албаныхан хөлхөлдөж, хэвлэлийнхэн байнга ирээд, айдас дунд л ажлаа хийж байлаа. Одоо ч тэр үетэй харьцуулахад арай тайван болоод байна.

-Танай байгууллагын эмч, мэргэжилтнүүд айдас дунд ажлаа хийж байна гэж нэг хэсэг хэвлэлээр шуугисан. Энэ тэгэхээр үнэний ортой байжээ?

-Үнэн байлгүй яахав. Бид чинь чанга ч ярьж болдоггүй, эгц харахад хэцүү  байсан. Энд тэндээс хамгаалалтынхан хараад бусад өвчтөнд эмчилгээ хийхэд тун хүндрэлтэй байсан. Угтаа бол энэ чинь дарга нарын эмчлүүлдэг эмнэлэг байсан шүү дээ. Гэтэл хоригдлуудын эмнэлэг болчихлоо.

Өвчтөн Х:

-Сайд нарын эмнэлэгт хэвтэн эмчлүүлээд хэр удаж байна вэ?

-Арав хонох гэж байна.

-Таны эмчлүүлж байгаа эмнэлгийн нэг тасгийг хоригдлуудыг эмчлэх тасаг болгон өөрчилсөн. Одоо МАХН-ын дарга Н.Энхбаяр нарын хоригдол эмчлүүлж байгаа. Энэ талаар мэдсэн үү?

-Эмнэлэгт эмчлүүлэхээс өмнө мэдэж байсан. Энд ирээд эмчлүүлж эхлэхэд ч гэсэн эмнэлгийн уур амьсгал нэг л өөр байсан. Өмнө нь би энэ эмнэлэгт гурван ч удаа хэвтэж байлаа. Гэтэл одоо эмч, сувилагч нарын эмчилгээ хийж байгаа нь ч гэсэн огт өөр болсон байна.

-Зарим өвчтөн эмчлүүлэхэд хүндрэлтэй байна гэж гомдол гаргаж байсан гэсэн. Энэ талаар?

-Тийм зүйл байгаа нь байгаа. Угтаа бол бид эмчилгээ хийлгэх гэж ирсэн болохоос биш айдас түгшүүрт нэрдвэгдэх гэж ирээгүй. Сайд нарын эмнэлэг гэхээсээ илүү шорон шиг болчихож. Бид сэтгэл санааны хувьд тайван амгалан байх ёстой. Гэтэл их дарамттай байна.

    Байдал ийм л байлаа. Эмчлүүлэх биш сэтгэл санааны гүн хямралд орчихоод сууж байгаа өвчтөн бухимдлаа илэрхийлж байна. Нийт ард түмний төлөө үйлчлэх ёстой Эрүүл мэнд яам, Хууль зүйн яам ийнхүү нэг хүний нөлөөн дор ажиллаж байгаад сэтгүүлч миний бие харамсаж байна.

    Шинэчлэлийн Засгийн газар нөгөө л байнга ярьдаг Ардчилсан нийгмийн үнэн царай ийм байхад Төрийн ордонд тухлан тэд иймэрхүү анзаарч анхааралдаа авах хэрэгтэй байх аа. Иргэний дуу хоолой үнэ цэнэгүй болсон өнөөгийн энэ нийгмийг ардчилсан нийгэм гэж хэлэхэд тун өрөвдөлтэй байна...