Ажлаа аваад удаагүй байгаа Төрийн өмчийн хорооны дарга Д.Цогтбаатар байгууллагынхаа үйл ажиллагааны талаар мэдээлэл хийлээ. Тэрээр хэвлэлийн хурлын эхэнд "Өнгөрсөн оны байдлаар төрийн өмчийн 24 компани үйл ажиллагааныхаа хувьд алдагдалтай ажиллаж байна. Төрийн өмчийн компаниуд алдагдалтай ажилладаг гэсэн сэтгэлгээг өөрчлөх хэрэгтэй. Өөрөөр хэлбэл нийгмийн өмнө хүлээсэн үүрэг болох үр ашигтай, санхүүгийн чадамж өндөр байдлаар үйл ажиллагаагаа явуулах ёстой. Төрийн өмчийн хороог удирдаж явуулж байхад удирдлагын менежмент  гэсэн арга барил байхгүй байна гэсэн дүгнэлтийг гаргаж байна. Тэр компанийн үйл ажилгааг үр ашигтай явуулахад энэ маш чухал.Нэг хүн томилоод явуулдаг. Гэтэл эргээд хариуцлага тооцох механизм сул байна. Бид одоо шалгалт явуулахдаа зүгээр л болж байна болохгүй байна гээд орхилгүй, яг ямар асуудал байна гэдэгт нь мониторинг, дүн шинжилгээ хийх болно. Жишээ нь, сая Багануурын үйлдвэрт шалгалт хийлээ. Гэтэл үндсэн хөрөнгө 90 тэрбум төгрөг, өр нь 70,5 тэрбум болсон байна.  Эрдэнэтэд гэхэд үйлдвэрлэл хэвийн явж байхад, худалдан авалт нь асуудалтай болчихож. Складын үлдэгдэлтэй болчихсон, ямар ч ашиглалтгүй дизель иддэг хоёр эксковатор байж л байна. 

Ингээд тэрээр Ленины музейн талаар сэтгүүлчийн асуусан асуултанд, "Ленины музей бол төрийн өмч. Энд ямар нэг өөр асуудал байх ёсгүй. Өмнөх нийгмийн байгууллагын үед иргэний хуульд зааснаар улсын хөрөнгө оруулалтаар хийсэн барилга байгууламжийг төрийн өмч гэж заасан. Иймд төр өмчөө буцааж авах нь бүрэн эрхийн асуудал. Тодорхой бичиг баримтууд бүгд бий. 1997 онд МАХН-ын өмч гэх шүүхийн шийдвэр гарсан боловч тодорхой баримтуудаар төрийн өмч гэдгийг нь нотолж байгаа. Тухайн үеийн Соёлын яамны бүртгэлийн баримт ч бий. Энэ тухай маргаан шүүхэд очсон байгаа бөгөөд одоогоор эцсийн шийд гараагүй"  гэсэн юм.