УИХ-ын чуулганы нэгдсэн хуралдаанаар Ерөнхийлөгчийн сонгуулийг товлон зарлах тухай УИХ-ын тогтоолын төслийг баталсны дараа “Монгол Улсын Ерөнхийлөгчийн сонгуулийн зардлын хэмжээг батлах тухай” Улсын Их Хурлын тогтоолын төслийг хэлэлцлээ.

Монгол Улсын Ерөнхийлөгчийн 2013 оны ээлжит сонгуулийн улсын төсвөөс санхүүжүүлэх зардлын хэмжээг 15.8 тэрбум төгрөг байхаар Сонгуулийн ерөнхий хорооноос ирүүлсэн. Уг саналыг Байнгын хорооны хуралдаанд оролцсон гишүүдийн дийлэнхи нь дэмжиж “Монгол Улсын Ерөнхийлөгчийн сонгуулийн зардлын хэмжээг батлах тухай” Улсын Их Хурлын тогтоолын төслийг чуулганы нэгдсэн хуралдаанд оруулах нь зүйтэй гэж үзсэн байна.

Харин Р.Бурмаа гишүүн байнгын хорооны санал дүгнэлттэй холбогдуулан  Сонгуулийн ерөнхий хороо үндэслэлгүйгээр өсгөсөн зардал оруулж ирж байна, иймээс төсвийн төлөвлөлтөд аудит хийлгэх нь зүйтэй гэсэн байр суурьтай байгаагаа хэллээ. Гишүүн Ц.Нямдорж түүнтэй адил саналтай байгаагаа хэлсэн юм.

Ингээд “Монгол Улсын Ерөнхийлөгчийн сонгуулийн зардлын хэмжээг батлах тухай” Улсын Их Хурлын тогтоолын төслийг батлах санал хураалт явуулахад хуралдаанд оролцсон гишүүдийн 57.1 хувь нь дэмжлээ.

Энэ удаагийн Ерөнхийлөгчийн сонгуульд 15.8 тэрбум төгрөг зарцуулахаар болж байна. Тогтоол батлагдсантай холбогдуулан УИХ-ын дарга З.Энхболд сонгуулийн зардлын төлөвлөлт, явц, гүйцэтгэлд нь аудит хийлгэх нь зүйтэй гэдгийг анхаарууллаа.УИХ-ын чуулганы нэгдсэн хуралдаан үргэлжилж байна.