Залуучуудын холбооны төв байранд "Залуу зохион бүтээгч 2013" үзэсгэлэн болж байна. Монгол Улсын Ерөнхий сайдын ивээл дор МҮОНТ-ээс МЗХ-той хамтран зохион байгуулж буй "Залуу зохион бүтээгч 2013" олон улсын уралдааны шилдэг 36 оролцогчийн бүтээл уг үзэсгэлэнд тавигджээ. Тус үзэсгэлэнгээр Ерөнхий сайд Н.Алтанхуяг зочилсон байна. Зохион бүтээгчид хүрэлцэн ирсэн Ерөнхий сайд тэргүүтэй төлөөлөгчдөд бүтээлийнхээ онцлог, давуу тал, хэрхэн ашиглах талаар мэдээлэл өглөө. Энэ үеэр Ерөнхий сайд Н.Алтанхуяг Монголын амьдралд хэрэгтэй, хэрэгжүүлж болохуйц бүтээлүүд хийсэн залуу зохион бүтээгчдээр бахархаж буйгаа илэрхийллээ.
Гурав дахь удаагаа зохион байгуулж буй "Залуу зохион бүтээгч 2013" уралдаанд ӨМӨЗО, ОХУ-ын Буриадаас зохион бүтээгчид оролцож буйгаараа онцлог. Мөн 12-28 хүртэлх насныхан оролцдог болохоор насны онцлогоос үл хамааран өрсөлдөх боломж олгодог давуу талтай юм. Үзэсгэлэнд нарийн ногоо үрслүүлэгч, автомат гутал арчигч, хаягдал тосоор ажилладаг зуух, хатаагч төхөөрөмж, нарны энергиэр ажилладаг камер зэрэг амьдрал хэрэгтэй сонирхолтой бүтээлүүдийг дэлгэжээ.
