Ийм агуулгатай үг хэллэг сүүлийн үед ерөнхий сайд Н.Алтанхуягийн амнаас байсхийгээд л гарах боллоо. Тэр өмнөх Засгийн газрын буруутай бодлогоос болоод би үйлээ эдлээд явж байна, улс орны эдийн засгийн доройтол өмнөх Засгийн газраас л улбаатай, өмнөх Засгийн газар л улс орныг буруу замаар будаа тээлгэсэн тухай нэг бус удаа гомдоллох юм. 

Өмнөх Засгийн газар байгаагүй бол улс орон гайхалтай сайхан байх байсан тухай түүний яриа цуварна. Өмнөх Засгийн газраас л болоод улс орон өрөнд орж өтөнд баригдсан юм байх. Өмнөх Засгийн газар л боломжийг ашиглаагүй юм байх. Өмнөх Засгийн газар л буруу гэрээ байгуулсан бололтой. Бүх л муу муухай юмыг тэр өмнөх Засгийн газартай холбож байна.

Өмнөх Засгийн газар байгаагүй байсан бол эдийн засаг ингэж хүндрэхгүй байх байсан бололтой. Өмнөх Засгийн газар байхгүй байсан бол түүний нэр хүнд ингэж унахгүй байсан бололтой. Өмнөх Засгийн газар байхгүй байсан бол тэр бас л төөрөхгүй байсан бололтой. Өөрийнх нь бүх л бүтэлгүйтэл өмнөх засгийн газраас болсон бололтой. 

    Монгол Улс олон л ерөнхий сайдтай байсан. 1990 оноос хойш л гэхэд д.Содном, Ш.Гунгаадорж, Д.Бямбасүрэн, П.Жасрай, М.Энхсайхан, Ц.Элбэгдорж, Ж.Наранцацралт, Р.Амаржаргал, Н.Энхбаяр, М.Энхболд, С.Баяр, С.Батболд, Н.Алтанхуяг гээд 13 ерөнхий сайд төржээ. Тэдний хэн нь ч Н.Алтанхуяг шиг өмнөх Засгийн газраас боллоо гэж гомдоллож байсангүй. Тэд ачааныхаа хүндийг үүр, асуудал бэрхшээлийг шийдвэрлэх л гэж чардайж байсан. Хэн нэгэнд бурууг тохож байгаагүй. Өмнөх хүнээс боллоо гэж бурууг бусдаас хайгаагүй. Нэгэнт ажлыг хийнэ гэж авсан учраас хийх л гэж зорьж байсан.

    Н.Алтанхуягийн яриагаар бол уул уурхайн салбарт ашиггүй гэрээ хийснээс болоод нүүрсээ зөөж чадахаа байсан, Улаанбаатарын цахилгаан станцыг өмнөх Засгийн газар шийдвэрлээгүй, өмнөх Засгийн газар л их өр тавьсан, өмнөх Засгийн газар л үүрэг гүйцэтгэгч тавьж болж байсан, өмнөх засгийн газрын үед газрын тосны үйлдвэрийг бариагүй, өмнөх засгийн газар л мөнгийг хавтгайруулж тараасан, өмнөх засгийн газрын үед л зүтгүүрээ барьцаалж зээл авсан, өмнөх Засгийн газар л Хятадаас зээл авахаар ярьсан гэх мэтээр түүний өмнөхөө шүүмжилсэн үй түмэн ярианаас л ишлэл авч болно. Ингэж өмнөхөө шүүмжлээд урьдахаа хийж чадахгүй байсан бол яах гэж ч ерөнхий сайд болсон юм бол доо. Өмнөхөө шүүмжлэх гэж эсвэл ерөнхий сайд болсон юм болов уу?

Яг үнэндээ ингэж ярих юм бол өмнөх Засгийн газрын тэргүүн шадар сайд хэн байсан бэ? Н.Алтанхуяг өөрөө л байсан шүү дээ. С.Баяртай ч, С.Батболдтой ч хамтарч суугаад бодлого гаргаж байсан. Тавантолгойн хэлэлцээрийг тэр өөрөө л ахалж байсан. Бас С.Батболдтой зэрэгцэж суугаад телевизээр иргэн бүртээ эх орны хишиг, хувь өгнө гээд өөрөө яриад байсан биз дээ. Өөрөө л энэ болохгүй бүтэхгүй гээд байгаа бүхнийхээ бодлогыг гаргаж байсан шүү дээ. Одоо тэгээд өмнөх рүүгээ чихээд байхаар өөр лүүгээ л бурууг тохоод байна гэдгээ ойлгодоггүй л юм байх даа.

Өмнөх Засгийн газарт ололт ч, амжилт ч, алдаа дутагдал ч байсан. Ямар ч байсан С.Батболдын засгийн газрын үед гадныхантай ойлголцоод болж байсан. Хөрөнгө оруулалт орж ирж байсан. Эдийн засаг өсч байсан. Нүүрсээ гаргаж чадаж байсан. Иргэддээ амласан мөнгөө өгч байсан. Kембрижийн стандарт, хөрөнгийн зах зээл гээд дэвшилтэт бүхэн нэвтэрч байсан. Харин одоо яаж байна. Хөрөнгө оруулалт буурлаа. Гадынхан гараад явлаа. Тэдэнтэй ойлголцохгүй байна. Хэвлэлийнхэнийг дарамталж байна. Эдийн засаг хүндэрлээ. Нүүрсээ гаргаж чадахаа байлаа. Нөөцөлсөн махных нь гуя нь хүртэл алга боллоо гээд үй түмэн муу жишээ байна. Энэ бүхнийгээ өмнөхөөсөө боллоо гээд бурууг бусдад тохоод сууж байх сайхан үйлсийн жишээ мөн үү? “Өмнөхөө гар буугаар буудвал хойч үе чамайг их буугаар буудна” гэсэн  агуулгатай үг бий. Энэ янзаараа ажлаа хийхгүй өмнөхөө шүүмжлээд суугаад байвал дараагийн ерөнхий сайд өөрийг нь улам ихээр шүүмжлэх болно. Яагаад гэвэл тэр өөртөө ийм л юмыг бий болгоод байна шүү дээ.