Өвлийн морины уралдаанаас болж уяач хүүхдүүдийн амь нас эрсдэх нь улам ихсэх болсон. Тиймээс өвлийн уралдаан гэдэг зүйлийг больё. Мөн хүүхдээр морь унуулах нь хүүхдийн эрхийг зөрчиж байна гэх мэтээр УИХ дахь эмэгтэй гишүүд өөрсдийн дуу хоолойгоо хүргээд байсан. Мөн тэд долоон шаардлага бүхий бичиг Засгийн газарт хүргүүлсэн. Энэ мэтээр асуудлыг хүмүүс хөндсөөр зургаан сар хүртэл морь уралдуулахгүй гэдэг шийдвэрийг гаргуулаад байгаа. Тэгвэл энэ бүх асуудлыг дорвитой сөхөж, хүүхэд морь унуулах эсэхийг ярилцахаар болжээ.     Монголын морин спорт уяачдын холбооны удирдах ажилтны III зөвлөгөөн энэ сарын 20-нд Улаанбаатар хотод болно. Салбар холбоодын тэргүүн, нарийн бичгийн дарга нар оролцох зөвлөгөөнөөр  морь уралдуулахтай холбоотой бүхий л асуудлыг хэлэлцэх юм. 2012 онд зохиогдсон хурдан морины уралдаан, оролцсон уяачид, унаач хүүхдийн тоо, 2009 оноос хойших уралдаан, наадамд оролцсон унаач хүүхдийн бэртэл гэмтэл ослын талаархи тоо баримт, унаач хүүхдийн хувцас хамгаалалтын хангалт, даатгалд хамрагдсан байдал зэрэг тайлангуудыг ч дэлгэх нь.

Уг нь яг хуулиндаа өвлийн уралдаан гэж байдаггүй. Хүмүүс өөрсдөө дур мэдэн өвөл уралдаан зохион байгуулаад байдаг. Үүнээс болд унаач хүүхдүүд бэртэж гэмтэх, улмаар амь насаар хохирох тохиолдол их гардаг билээ.