АТГ-ын Мөрдөн шалгах хэлтсээс албан тушаал, эрх мэдлээ урвуулж, компаниудад татвараас зайлсхийх боломж олгосон, авлига авсан гэх үндэслэлээр Татварын Ерөнхий газрын дэд дарга Ж.Батбаярыг эрүүгийн хэрэгт татан шалгаж эхэлсэн юм.

Тэгвэл Эрүүгийн цагдаагийн газрын Эдийн засгийн гэмт хэрэгтэй тэмцэх хэлтсийн ажилтнууд түүний хувийн компанийг шалгахад татвараас зайлсхийсэн, гэмт хэргийн шинжтэй ноцтой баримтууд байгааг илрүүлж Улсын мөрдөн байцаах газрын Эдийн засгийн гэмт хэрэг мөрдөх хэлтэст шилжүүлээд байсан.

Улмаар УМБГ-аас АТГ-т шалгагдаж буй Ж.Батбаярт  дахин эрүүгийн хэрэг үүсгэсэн гэсэн мэдээлэл гараад байсан. Тэгвэл дахин эрүү үүсгэсэн нь үнэн хэмээн АТГ-ын Мөрдөн байцаах албаны дарга Э.Амарбат тухайн мэдээллийг баталлаа. Эх сурвалжийн хэлж буйгаар  Ж.Батбаяр "Туул голын эрэг дагуу хайрга олборлох үйл ажиллагаа явуулдаг “Булган газар” хэмээх компанийг худалдан авч, хувьцааных нь 50 хувийг эзэмшиж байсан аж. Эл компанийн  улсад төлсөн татварын мэдээллийг ЭЦГ-ын Эдийн засгийн гэмт хэрэгтэй тэмцэх хэлтсийн ажилтнууд шалгахад гэмт хэргийн шинжтэй, татвараас зайлсхийсэн ноцтой баримтууд байгааг тогтоосон" гэв.