Монголд цөмийн хаягдал байгуулах гэж байна гэсэн хардалт сүүлийн жилүүдэд бий болж зарим иргэд, байгууллага эсэргүүцэн жагсаж байсан удаатай. Тэгвэл манай улсад цөмийн хаягдал булахаар төлөвлөж байгаа баримт олдлоо. Энэхүү баримт цөмийн хаягдал булахад улсын төсвөөс их хэмжээний мөнгө төсөвлөснийг харуулж байна. Эрх баригчид энэ асуудлаар тайлбар хийнэ хэмээн найдаж байна.

Байгаль орчны иргэний зөвлөлийн Цөмийн ажлын хэсгийн зохицуулагч Ч.Мөнхбаяр "Монголд цөмийн хаягдал булшлах асуудал 1990-ээд оноос их, бага хэмжээгээр яригдаж ирсэн. Фукушимагийн ослын дараа цөмийн асуудал хүмүүсийн анхаарлыг их татсан. Үүнээс үүдэн, Монголд цөмийн хаягдал хаях гэж байна гэсэн асуудал илчлэгдэн гарч ирсэн. 2011 оноос цөмийн хөнөөлийг эсэргүүцсэн тэмцэл хөдөлгөөн их өрнөсөн. 2011 онд цөмийн хаягдал булшлах олон улсын гэрээ хэлэлцээр хийгдсэн байна гэсэн асуудал их яригдсан. Үүнд АНУ-ын Цөмийн Эрчим хүчний албаны захирал  Ричард Стратфорд, Япон Улсын гадаад хэргийн сайд Мацумото, тэргүүн дэд сайд Такахаши, Монголын Цөмийн энергийн газрын дарга асан Д.Энхбат зэрэг албан тушаалтан, гадаад дотоод хэвлэлүүд яриа тохироо байсан гэж баталсан. Ер нь цөмийн хаягдал булшлах асуудлыг янз бүрийн нэр томъёогоор дамжуулж бичиг баримтад тусгасан байдаг. Яг манайд цөмийн хаягдлыг булшилна гэсэн баримт бичиг олдоход бэрх. Тэгсэн мөртлөө Монголын цөмийн санаачлагыг дэмжин ажиллана гэсэн баримт бичиг байдаг" хэмээн ярьсан нь үнэнд ойрхон аж.