Энэ долоо хоногт ОХУ-ын Байгалийн нөөц, экологийн яамны орлогч сайд Ринат Гизатулин Төрийн дум дахь сонсголын үеэр Байгаль нуурыг дотоодын төдийгүй хөрш орнуудын, тэр тусмаа Монголын бохирдуулагчдаас хамгаалах хэрэгтэй гэж хэлжээ. Эрхэм сайд ам халахдаа “Энд байгаа бүхий л байгууллагын төлөөлөгчид биднээс төдийгүй мөн гадны дайснуудаас Байгаль нуурыг хамгаалаасай гэж хүсч байна. Гадаад орноос хэдэн арван жил дамнан сая сая тонн бохир бодисоор нуурыг хордуулж байгаа ч олонх нь дуугүй байсаар” гэж мэдэгдлээ.

Гизатулин  цааш нь Төрийн думын сонсголд ирсэн Грийнпийсийн төлөөлөгчдөөс Байгаль нуурыг бохирдуулагч гол “дайсан” болох Монгол улсад яагаад танай салбар байдаггүй юм гэж ам асуужээ.


-Монголд аль дивангалавын аргаар алт олборлодог. Үүнээс үүдэлтэй экологийн асуудал нь Байгаль нуурт манай цаасны үйлдвэрээс хэдэн арав дахин аюултайгаар нөлөөлж байна гэж сайд хэлсэн байна.
Оросын засгийн газрын экологийн дайснаар тодорсон монголчуудыг өмгөөлж олон улсын байгаль хамгаалах байгууллага Greenpeacе-ийн төлөөлөгчид мэдэгдэл гаргажээ. “Байгаль нуурийн эрэг дээр үйлдвэрлэл явуулдагь целлюлоз, цаасны үйлдвэрийн хорыг хэдэн арав дахин даваад байгаа Монголын бохир нөлөө гэж юм юу ч байхгүй” гэж Greenpeacе-ийн экологичид мэдэгдэв.

Нуурын эрэг дээрх целлюлоз, цаасны үйлдвэрийн хаягдал Байгалийн бохирдлын 90 гаруй хувь болж байгааг Оросын байгаль хамгаалах яамны 2011 оны тайланд дурдсан байна. Greenpeacе-ийн хэвлэлийн албаны мэдээлж буйгаар тус үйлдвэр 2011 онд 26 сая шоо метр дутуу цэвэршүүлсэн хаягдал усаа нууранд асгасан бол ойр орчмын суурин газруудын бохир, хөлөн онгоцны хаягдал үлдэх хувийг эзэлдэг юм.


“Сэлэнгэ мөрний салаанууд байгалийн шүүгч маягаар ажиллаж, голын эхнээс буюу Монголоос ирж байгаа усыг хангалттай цэвэршүүлдэг тул ямар ч хортой нөлөө үгүй. Монголын хилээс Байгальд цутгах хүртлээ Сэлэнгэ мөрөн 409 км урсдаг. Оросын нутаг дэвсгэр дээр Сэлэнгэ мөрний эргээр Улаан Үдийг оролцуулаад үйлдвэрлэлийн хаягдлаа гол руу хийж бохирдуулдаг олон арван хот суурин бий. Монголын хилээс Улаан Үд хүртэл цутгал голууд нэмэгдсээр Сэлэнгэ мөрний усны хэмжээ 3 дахин их болдог. 2011 оны засгийн газрын судалгааны тайланд дурдсанаар Монголын нөлөө Новоселенгинск хүрээд ул мөргүй алга болдог болохоор Оросын нутаг дахь зам зуурын хотуудын үйлдвэрлэлийн хаягдал л бохирдлын эх сурвалж болж байна ” гэж Greenpeacе мэдэгдлээ.

Харин тэд Монгол улсын Засгийн газраас Сэлэнгэ мөрөн дээр далан, усан цахилгаан станц барих, усыг нь Говь руу татахаар зэхэж байгаа нь Байгаль нуурт асар их аюул авчирч болохыг анхааруулаад, энэ талаар Монголын талд хандсан ч хариу авч чадаагүйгээ хэлжээ. Greenpeacе-ийн салбар байдаггүйн шалтгаан нь Монголд байгаль хамгаалах идэвхтнүүд хангалттай олон байдаг бөгөөд экологийнг асуудлаа амжилттай шийдэж чаддаг учраас гэж мэдэгдэлд дурджээ.