Өнөөдөр болох зарим үйл явдлуудыг нэрлэж байна-Засгийн газрын ээлжит хуралдаан өнөөдөр 10.00 цагаас эхэлж, 30 орчим асуудлыг хэлэлцэн шийдвэрлэхээр төлөвлөсний дотор нууц асуудал ч багтаж байна.
-15 цагт Буянт-Ухаа спорт цогцолборт төрийн албан хаагчдын чуулган болно. Яам, агентлагууд болон нийслэлийн захиргааны төрийн бүх байгууллагын албан хаагчид оролцоно.
- Эрүүл мэндийн салбарын хөгжил, оношилгоо, үйлчилгээгээрээ Азид төдийгүй дэлхийд өрсөлддөг нарийн мэргэжлийн хамгийн шилдэг эмч нарыг багтаасан Пасифик Эрүүл Мэндийн Төв нь Монгол улсад анагаах ухааны хамгийн сүүлийн үеийн оношилгоо эмчилгээний дэвшилтэт аргачлалыг танилцуулах арга хэмжээ өнөөдөр болно. Монгол улс дахь төлөөлөгчийн газар “Стар Фарм” ХХК-тай хамтран 14:00 цагт Улаанбаатар хот дахь "Blue Sky Hotel & Tower" зочид буудлын 3-р давхрын "Topaz" зааланд зохион байгуулах гэж байна.
-Энэ оны шатрын насанд хүрэгчдийн Улсын аварга шалгаруулах тэмцээний шигшээ тоглолтын 10, 11 дэх өргүүд Тусгаар тогтнолын ордонд болно. Тэмцээнд шилдэг 14 шатарчин оролцож байгаагаас тэмцээний сүүлийн өрөг маргааш болж, 2013 оны улсын аваргууд тодорно.
-Монголын Оюун Ухааны АКАДЕМИ-аас санаачлан зохион байгуулж буй “Ой тогтоолтын үндэсний аварга-2013” оюуны спортын гурав дахь удаагийн тэмцээний эцсийн шалгаруулалт өнөөдөр Классик Центрт болно. Тус тэмцээний эхний шалгаруулалт өнгөрсөн долоо хоногт болж бага, дунд болон насан хүрэгчдийн ангилалд нийт 152 тамирчин ой тогтоолтын зургаан төрлөөр өрсөлдөж эцсийн шалгаруулалтанд оролцох 38 тамирчин үлдсэн.
-Монгол улсын Ерөнхийлөгчийн ивээл 7 дахь удаагаа зохион байгуулагдаж буй “Дуулиан-2020” тэмцээний шөвгийн 16-ийн тоглолтууд дундаа орж байна. Тэгвэл “Дуулиан-2020” тэмцээнд ивээн тэтгэгчээр оролцож байгаа байгууллагуудын хоорондох 11 дэх удаагийн тэмцээн өнөөдөр, маргааш Мон-Алтиус биеийн тамирын дээд сургуулийн зааланд явагдана.
-Монгол улсын Морин хуурын чуулгын “Playing love-III” тоглолт 19.00 цагаас Соёлын төв өргөөнд болно. Тус тоглолтод Монголын дэлгэцийн бүтээлүүдийн сор болсон “Мандухай сэцэн хатан”, “Би чамд хайртай”, “Гарын таван хуруу” зэрэг киноны аянууд, мөн дэлхийн шилдэг бүтээл болох “Playing love”, “Карибын тэнгисийн дээрэмчин”, “Gladiator” зэрэг киноны хөгжмүүд эгшиглэх аж.
-Гэгээн хайрын эмгэнэлт түүхийг өгүүлэх "Бахчисарайн оргилолт булаг" балет өнөөдөр Дуурь, бүжгийн эрдмийн театрын тайзнаа дахин амилах гэж байна.
