Мэдээлэл технологийн үсрэнгүй хөгжилтэй өнөө үед онлайн форумд чөлөөт цагаа өнгөрөөдөг хүмүүс таньж мэдэхгүй гадаад хүмүүстэй холбогдож танилцдаг.  Улмаар нэр хаягаа солилцдог. Ингэснээр хохирогч болдог. Нөгөө утгаар тухайн хүнтэй онлайн секс хийгээд түүнийг нь youtube ч юм уу олон нийтийн сайт дээр тавина гэж сүрдүүлдэг. Мөн онлайнаар хуурамч хаяг үүсгэж, фэйсбүүк, мессенжерээр хүмүүстэй танилцаж хувийн мэдээллийг нь авч буруу зүйлд ашиглах тохиолдол их гарах болжээ. Үүнд хуурамч онлайн худалдаа ч багтах юм.  Тухайлбал, хувцасны онлайн дэлгүүрээс бараа худалдаж авахдаа данс руу нь мөнгө хийдэг байна. Ингэхдээ анзааралгүй, баталгаатай бус данс руу хийж мөнгөө алддаг аж.

Тодруулбал, Ийм байдлаар манай хэд хэдэн залуу хохирогч болж Эрүүгийн цагдаагийн газраас хэргийг шалгаж байгаа юм. Саяхан нэг монгол хүн ийм хэргийн хохирогч болж, түүний дүрс бичлэгийг олон улсын хэд хэдэн сайтад цацсан хэрэг гарсан аж. Эрүүгийн цагдаагийн газраас хэргийг шалгаад олон улсын сайтуудад гарсан бичлэгийг устгуулах арга хэмжээ авсан байна. Гэхдээ аль улсын ямар иргэн бичлэгийг цацсаныг олоогүй байгаа юм байна. Олон нийтийн сайт ашиглаж, хүний нэр хүндэд халдан сүрдүүлж мөнгө нэхдэг бүлэглэл байж болох талтай аж. Эх сурвалжийн мэдээлснээр энэ төрлийн хохирогч болсон монгол охид, залуучуудаас 3-5 мянган ам.доллар нэхсэн байжээ.   Энэ мэтийн хэргийн золиос болохгүй байхыг анхаарахыг Цагдаагийн байгууллагаас анхаарууллаа.

Д.Ундрах /24tsag.mn/