Дэлхийн бөмбөрцгийн Хойд туйлын зулайд хүрэх түүхэн аяллаа эхлүүлсэн гавьяат тамирчин Г.Өсөхбаяр бямба гарагийн шөнө багийнхантайгаа Норвегийн Лонгиэрбайн хотоос Барнео баазыг зорьжээ.

Лонгиэрбайн нь Норвегийн хамгийн хойд захын жижиг хот бөгөөд Барнео нь Хойд туйлд хамгийн ойр орших мөсөн дээрх ОХУ-ын хувийн эзэмшлийн түр бааз юм. Хойд туйлын 90 градуст хүрэх аялалд мордсон багийнхан дөрөвдүгээр сарын 7-нд Лонгиэрбайн хотод нэгдэж, хамтарсан бэлтгэл хийж байсан. Тэд гурав хоног туйлын нөхцөлд бэлтгэл хийж байгаад,  энэ сарын 10-нд үндсэн аяллаа эхлүүлэхээр төлөвлөсөн хэдий ч цаг агаарын байдлаас шалтгаалан хойшлуулжээ. Харин экспедицийнхний хувьд ямар ч аялал цаг агаарын байдлаас хамаатай байдгийг сайн мэдэх учраас багийн гишүүн бүр хувийн бэлтгэлээ базааж, аялалдаа бэлтгэж байгаа тухай Хойд туйлын экспедицийн блогт мэдээлжээ. Хойд туйлын аяллын баг Англи, Австрали, АНУ, Португали зэрэг орны найман тамирчнаас бүрджээ. Гавьяат тамирчин Г.Өсөхбаярын хувьд Эверестийн оргил /8848метр/-д хоёр удаа гарсан болон Хойд Америкийн ноён оргил Маккенли /өндөр 6195 метр/, Африк тивийн ноён оргил Килиманжаро, /өндөр 5895 метр/, Европ тивийн ноён оргил Эльбрус /өндөр 5642 метр/-ын оргилд гарсан амжилтаараа Хойд туйлын багт нэгдсэн өөрийн багийн тамирчдаас чансаагаараа гуравдугаарт орж байна.