УИХ-ын сонгуулийн 26 дугаар тойрог нийслэлийн Сонгинохайрхан дүүргийн дахин сонгууль өчигдөр болж өнгөрсөн.

Тус тойрогт АН-аас Л.Эрхэмбаяр,  МАН-аас Д.Сумъяабазар нар нэр дэвшин өрсөлдөж Д.Сумъяабазар сонгогчдын 55 хувийн үнэмлэхүй саналаар ялалт байгуулсан урьдчилсан дүн гараад байсан.

Өнөөдөр 11.00 цагт ялалт байгуулсан Д.Сумъяабазарт түр үнэмлэхийг нь гардуулна гэж байсан. Гэвч тойргийн хороо хуралдаагүй гэх шалтгаанаар үнэмлэхийг нь гардуулаагүй байна. 

Учир нь хуулийн дагуу санал хураалт 22.00 цагт дуусах ёстой ч хоёр цагийн өмнө дуусгалаа хэмээн нэгэн иргэн тойргийн хороонд гомдол гаргажээ.  Тодруулбал, 2012 оны арваннэгдүгээр сарын 1-ний өдөр УИХ-ын даргын захирамжаар гаргасан тогтоолын хоёрдугаар зүйлд “Монгол Улсын Их хурлын сонгуулийн тухай хуулийн 41 дүгээр зүйлийн 41,1 дэх хэсэг, 45 дугаар зүйлийн 46,1 дэх хэсгийн 20.00 цаг гэснийг 22.00 гэж өөрчилсүгэй” гэжээ. Тиймээс 20.00 цагт сонгуулийн санал хураалтыг дуусгасан нь хууль бус гэж үзэн дахин сонгууль явуулах хүсэлтэй байгаа аж.
 УИХ-ын тогтоолыг зөрчсөн эсэхийг тойргийн хорооны хуралдаанаар шийдвэрлэх юм байна. 26-р тойргийн хороо 12.00 цагаас хойш хуралдаж байгаа юм.