Хэдхэн хоногийн өмнө “Хамаг монгол” төслийн хүрээнд Буриадад ажилласан МУГЖ С.Жавхлан эхнэрийн хамт Халимагийн нийслэл Элстэйд очжээ. Улаанбаатарт амжилттай болж өнгөрсөн монгол туургатан таван залуугийн тоглолтыг тэрээр одоо Улаан Үд, Элстэй, Кызыл, Хөх хотод хийхийг зорьж байна. Халимагт ирэх 5-6 дугаар сард “Хамаг монгол” тоглолтоо зохион байгуулахаар үндсэндээ тохиролцсон гэж Элстэйн хэвлэлүүд бичиж байгаа юм.

Өнгөрсөн долоо хоногт С.Жавхлан эхнэр болон “Хамаг монгол” төслийн захирал Батбаярын хамт Халимагийн хүүхдийн уран бүтээлийн төвд зочилжээ. Хүндэт зочиддоо зориулсан тоглолт үзсэн монгол дуучин нулимсаа барьж тэвчсэнгүй. Багад нь эмэг эхийнх нь дуулж өгдөг байсан уртын дууг бяцхан жаал дуулсан нь С.Жавхлангийн дотрыг өмлөж орхижээ. Түүний урын санд “Улаан залаатай халимагууд”, Тачал”, “Төрөлмүүд” зэрэг халимаг ардын дуу байдаг. Харин энэ удаагийнхаа явалтаар тэрээр “Актюбин голын усн” хэмээх дууг шинээр дуулж, клипний зураг авалтаа Халимагт хийлгэж байна.