Иргэний шударга шүүх ТББ-ын тэргүүн Х.Бат-Ялалт хэвлэлийнхэнд хандлаа. Тэрээр хурлын үеэр  2006 онд хүнд зодуулж улмаар эрүүл мэндээрээ маш их хохирсон  Н.Батмягмар гэх залуугын талаар мэдээлсэн юм.

Х.Бат-Ялалт хэлэхдээ "Н.Батмягмар  эрүүгийн гэмт хэргийн улмаас 2007 оноос хэлмэгдэж хохирсоор өнөөдрийг хүрсэн.  Харамсалтай нь төр засгаас энэ хүний эрүүл мэнд амь насных нь баталгааг хангаж байгаа юм алга. Маргааш түүний шүүх хурал Сонгинохайрхан дүүрэгт болно. Гэмт хэргийн улмаас хохирсон хохирлоо нэхэмжилж байгаа.

2007 он бол хэлмэгдсэн гэгдэх Ерөнхийлөгч Н.Энхбаярын үед үйлдэгдсэн гэмт хэрэг. Н.Батмягмар бусдад зодуулсан боловч өнөөх залуус нь өршөөлийн хуулиар суллагдсан. Гэхдээ өнөөдөр энэ залуу маань нуруу нугасны гэмтэлтэй, өдрөөс өдөрт бие нь муудаж байгаа. Гэтэл гэмт хэргийн улмаас хохирсон хохирогчийн эрүүл мэндийн хохирлыг төлдөг хохирлын сан, иймэрхүү санал санаачлагыг гаргаад явахаар дэмждэг улс төрийн хүчин, улс төрчид өнөөдөр байдаггүй.

 Хэлмэгдэж,  хохирсон 10000 гаруй иргэдийн гомдлыг цуглуулаад бид зогсоосон.  Үүний цаана маш олон хилс хэргийн золиос болсон хүмүүс байгаа.

Албан ёсоор хүний эрхийг хамгаалах ёстой хуулийн байгууллагууд өнөөдөр үнэнч шударгаар ажиллаж чадахгүй байна. Хэлмэгдүүлэлт, хилс хэргийн эсрэг бүх нийтээрээ тэмцэх хэрэгтэй. Тиймээс бид өнөөдөр улс төрийн намуудад шаардлага хүргүүлж байна.  Улс төрийн намуудтай эхний ээлжинд уулзалт зохион байгуулахаар төлөвлөж байгаа.  Хамгийн гол нь мөрийн хөтөлбөртөө ямар нэг байдлаар шударга ёсны тухай, шүүхийн шинэчлэлийн тухай үг өгүүлбэр оруулж өгөөч хэмээн саналаа хэлэх юм.  УИХ-д суудалтай таван намд шаардлага хүргүүлж байна.

  Хохирогч Н.Батмягмарын ээж Наранцэцэг: Миний хүү ярьж чаддаггүй, чих дүлий, бэлэг эрхтэн ажиллагаагүй болсон

-Таны хүү Н.Батмягмар хаана ажилладаг байсан. Юунаас болж ийм хэрэг гарсан бэ?
Миний хүү "Метрополист" ажилладаг байсан.  2007 оны арванхоёрдугаар сарын 26-ны 20.30 цагт Равдансамбуу гэх тус газрын зохион байгуулагч залуугаас 21 хоног ажилласан цалингаа авахыг хүссэн байгаа. Гэтэл миний хүүхдийг хоёр хоног ажилласан хэмээн худал гүтгэж цалинг нь өгөөгүй. Ингээд миний хүүг Метрополисийн скаладанд оруулж зодсон. Ингэхдээ бүр хаалгаа цоожилж байгаад зодсон байсан.  Санаатайгаар зодсон энэ хэргийг   Баянзүрх дүүргийн цагдаа Ганхүү үгүйсгэсэн.

-Зодуулах үедээ ямар бэртлүүд авсан бэ?

-Араас нь өшгөлөөд, шанаа, чих, хамар руу нь цохиж, хана мөргүүлсэн байгаа. Төмсөгрүү нь хүртэл өшгилсөн. Тэр үед хүүгийн маань ууц, нуруу өвдөж, шээсээр нь цус шүүрч, явж чадахгүй байсан. Мөн бэлэг эрхтэн нь ажиллаагүй болж, төмсөгний няцрал, найм есдүгээр үеийн ясны хугаралттай байгаа. Мөн эрүүний хугаралттай учир дуугарч, хатуу зүйл идэж болохгүй, чихрүүгээ цохиулснаас болоод баруун чих дүлийрсэн. Хамар хугаралттай, бөөрний өвчтэй болсон. Ой санамжаа ч алдаж эхэлж байгаа. Өвчин нь өдрөөс өдөрт хүндэрч байгаа.

-Таны хүүг зодсон Равдансамбуу гэх залуу эргэж ирж байсан уу?

-Хүүг маань зодсон хүн биеийг нь нэг ч  асуугаагүй. Одоо Таваншар дахь "Доктор авто сервес"-ийн газар захиалга хүлээн авагч, менежерийн ажил хийгээд явж байгаа. Харин бид хоёр хувийн эмнэлэг, хувьсгалын эмнэлэг гээд яваагүй газаргүй болоод байна.

-Баянзүрх дүүргийн байцаагч Равдансамбууг санаатайгаар таны хүүг зодоогүй гээд байгаа гэсэн үү?

- Зодсон хүмүүсийг Баянзүрх дүүргийн байцаагч Ганхүү хамгаалж, хүү бид хоёрыг дарамталж байсан. Өдгөө тэр Равдансамбуугийн эрүүгийн хэрэг иргэний хэрэг болоод Сонгинохайрхан дүүрэгт шилжиж ирсэн.

-Эмчилгээний зардалд барагцаалбал хэчнээн төгрөг зарсан бэ?

-Бодит зардал нь 24.372.300 төгрөг гарсан. Эмч нарын хяналтанд байнгын явж байгаа. Америкт очиж эмчлүүлэхийг эмч нар зөвлөж байгаа.
Миний хүүхэд Техникийн их сургуулийн дулааны инженерийн анги төгссөн. Гэтэл өдгөө ажлын чадваргүй болсон.