Сонгинорхайрхан дүүргийн 26 дугаар тойрогт АН-аас нэр дэвшсэн Л.Эрхэмбаяр Төрийн ордонд хэвлэлийн хурал хийлээ.  УИХ-ын 2012 оны сонгуулиар Сонгинохайрхан дүүрэгт саналын хувь нь хүрээгүйгээс дахин санал хураалт явуулах болсон. Гэвч өнгөрсөн амралтын өдөр болсон дахин санал хураалт нь хууль зөрчсөн гэж үзэх хүмүүс байгаа. Тэгвэл АН-аас нэр дэвшсэн Л.Эрхэмбаяр энэ талаар хэвлэлийнхэнд байр сууриа илэрхийллээ. Тэрээр "Сонгуульд оролцсон сонгогчиддоо баярлалаа. Мөн миний төлөө санал өгсөн сонгогчиддоо баярлалаа. Надаас илүү санал авсан Д.Сумъяабазарт баяр хүргэе" гэж хэлэн ялагдлаа хүлээн зөвшөөрсөн юм. Тэрээр энэ цаг мөчөөс эхлэн УИХ-ын 26 дугаар тойрогтой холбоотой аливаа асуудалд ямар ч хамааралгүй болсноо зарласан юм. Сонгуулийн санал хураалт өндөрлөх хугацаа 20.00 цаг биш 22.00 цаг байх ёстой гэсэн маргаан үүсээд буй. Үүнийг тэрбээр СЕХ, тойргийн хорооны асуудал гэлээ.

Хэрэв 26 дугаар тойрогт дахин сонгууль хийхээр болбол Л.Эрхэмбаяр оролцохгүй гэдгээ бас мэдэгдсэн юм. Гэхдээ тэрээр их улс төрөөс гарахгүй, ардчиллын төлөө цаашид ч зүтгэнэ гэдгээ илэрхийлсэн.