Зам тээврийн осол хэргийн гаралтын талаар Замын цагдаагийн газрын урьдчилан сэргийлэх хэлтсийн байцаагч, ахлах дэслэгч Б.Лхагважаргалаас тодрууллаа.

-Статистик тоо баримттайгаар улсын хэмжээнд бүртгэгдсэн зам тээврийн осол гэмтлийн талаар мэдээлэхгүй юу?

-Өнгөрсөн онд 404 зам тээврийн осол бүртгэгдэж байсан. Энэ оны хувьд 398 болж 1.5 хувь буурсан байгаа. Харин нас баралт өнгөрсөн оны энэ үед 73 байсан бол энэ онд 51 болж 30.3 хувиар буурсан маш сайн үзүүлэлттэй байна.

-Гэмт хэргийн улмаас зам тээврийн осолд гэмтсэн хэчнээн хүн бүртгэгдсэн байна?

-184 хэрэг өнгөрсөн онд бүртгэгдэж байсан. Харин энэ онд 203 болж 10.3 хувиар өсчээ. Замын тээврийн осол гэмтлийн улмаас нас барсан иргэний тоо 30.3 хувиар буурсан.

-Өчигдөр орсон цаснаас болж осол аваар гарах нь ихэссэн гэж сонссон?

-Орон нутгийн замд зам тээврийн осол гэмтлийн гаралт нэмэгдэх янзтай байна. Өчигдөр өглөө л гэхэд Сонгинохайрхан дүүргийн нутаг Эмээлтийн замд Тоёото Ланд круйзер маркийн 52-25 УНӨ улсын дугаартай автомашин хальтиргаанаас болж өөдөөс ирж явсан тээврийн хэрэгслийг мөргөж зам тээврийн осол гаргасан. Үүний улмаас таван хүн гэмтээд байгаа. Тэгэхээр иргэд, жолооч нар цаг агаарын таагүй нөхцөлд орон нутгийн замд гарахдаа анхаарлаа хандуулах шаардлагатай байна.

-Аль дүүрэгт ихэвчлэн зам тээврийн осол гарч байна?

-Ер нь зам тээврийн осол хэргийн Улаанбаатарт 242 хэрэг гарсан. Хөдөө орон нутгийн замд 143 осол гарсан байгаа. Эндээс харахад хөдөө орон нутгийн замд харьцангуй бага юм шиг харагдаж байгаа боловч хүний нас баралттай тохиолдол орон нутагт харьцангуй илүү байна.  Маргааш нөгөөдрөөс дахин цас орно гэсэн мэдээлэл ирж байгаа. Тэгэхээр иргэд хурдаа зөв тохируулах хэрэгтэй байна. Нар талаасаа цасгүй байгаа хэдий ч хурд хэтрүүлж, хунгар газар цасанд боогдож хамгийн их осол аваарыг гаргаж байна.

-Урьдчилан сэргийлээд Замын цагдаагаас ямар ажлууд хийгдэж байна?

-Замын цагдаагийн газрын орон нутгийн хөдөлгөөний хяналтын хэлтэс бүх орон нутагт байгаа тасгуудтайгаа хамтарч ажиллаж байгаа. Нөхцөл байдлыг шалгаж, аваар болж байгаа газарт шалгалтыг явуулж байна.
 
-Орон нутгийн замд одоогоор хаагаад байгаа зам бий юу?

-Өнөөдрийн байдлаар ямар ч зам хаагаагүй байна.

-Хүүхэд бэртэх тохиолдол өмнөх жилийнхтэй харьцуулахад ямар хандлагтай байна?

-Зам тээврийн ослын улмаас гэмтсэн хүүхэд өнгөрсөн оны эхний гурван сарын байдлаар улсын хэмжээнд дөрвөн хүүхэд нас барж байсан байгаа. Тэгвэл 2013 оны эхний улиралд  тав болж өссөн байна.
Хүүхэд зам тээврийн осолд өртөхийн ихэнх хувь эцэг, эхээс шалтгаалж байгаа. Нэг өдөрт л гэхэд 12 хүүхэд гэмтэж байна. Үүнээс дөрөв нь эцэг эхтэйгээ явж байгаад гэмтэж бэртдэг. Бусад найман тохиолдол нь сургуулийн насны хүүхдүүд, тэр дундаа 10-15 насны хүүхдүүд замын хөдөлгөөнд оролцохдоо сургуулийн ойр орчимдоо гэмтсэн байдаг.

-Сургуулийн ойр орчимд "зогс" тэмдэг байрлуулж багш нар ээлж ээлжээрээ гарч замаар гарч буй хүүхдүүдэд тусалдаг байх аа?

-Багш нар энэхүү үүргээ биелүүлж байгаа эсэх дээр Замын цагдаагийн газраас тогтмол шалгалт явуулж байгаа.  Багш нар үүргээ биелүүлэхээр гараагүй тохиолдолд  Нийслэлийн боловсролын газарт арга хэмжээ тооцуулахаар албан тоот хүргүүлдэг.

-Энэ журмыг биелүүлээгүй сургуулиулаас нэрлэхгүй юу?

-Нийслэлийн 40 дүгээр сургууль энэ журмыг биелүүлэхгүй байсан. Харин удаа дараа шаардлага тавьсаны үндсэн дээр "зогс" тэмдэг байрлуулах журмыг хэрэгжүүлж байгаа.

-Дуудлага 102 дугаарт авах болсон. Энэ нь үнэ төлбөргүй дугаар биз дээ?

-Зам тээврийн осол хэргийн дуудлага 102 дугаараар авах болсон. Өмнө нь зам тээврийн осол хэрэгт холбогдохдоо төлбөртэй дугаарт холбогддог байсан. Харин одоо үнэгүй болсон.

-Согтуугаар жолоо барих явдал улам ихсээд байна. Энэ тал дээр ямар ажил зохион байгуулж байна?

-Согтуугаар автомашин жолоодох зөрчлийг өдөрт дунджаар 70 орчмыг илрүүлж ажиллаж байна.  Энэ байдлаас болж дүүргүүдийн Замын цагдаагийн байгууллагын хүн хүчийг нэмсэн. Хяналт шалгалтыг эрчимжүүлж байгаа. Өмнө нь өдөртөө 40-50 согтуу жолооч илэрдэг байсан. Одоо бол эрс нэмэгдсэн. Мөн хяналт шалгалтаа ч нэмсэн.
 
-Согтуу жолоочид ямар хариуцлага хүлээлгэж байна?

-Захиргааны хариуцлагын тухай хуулийн 25.1-т зааснаар тээврийн хэрэгслийг жолоодох эрхийг хасах хүртэл хариуцлага тооцдог. Дээрх зөрчлийг давтан гаргсан бол Шүүхийн шийдвэрээр 7-30 хоног баривчилдаг.