Засгийн газрын тэргүүнийг огцруулах гэсэн МАН-ын санаархал үр дүн муутай ч гэсэн амны зугаа болгох хөгтэй, хачиртай явдлуудаар дүүрэн байна. Өчигдөрийн байнгын хорооны хурал дээр асуудалд ороод байгаа Ерөнхий сайд Н.Алтанхуяг ээлжит болчимгүй үг хэллэгээрээ МАН-ынхныг баясгасан ч гэсэн өөрийгөө хэн бэ гэдэгээ ард түмэндээ бас нэг таниулаад авав.

Тэрээр өөрийг нь боргоосон МАН-ынхны асуултад хариулахдаа “Та нар яасан их хууль мөрддөг юм”, “Бидний одоо хийж байгаа бүхэн өмнөх Засгийн газрын хийж байсан буруутай үйлдэл”, “Би шийдвэрээ урж хаяагүй, хүчингүй л болгосон штээ” гэх мэт төрийг жолоодож яваа хүний амнаас гармааргүй супер үгнүүдийг унагасан гэж шуугилдав. Даан ч болчимгүй үг хэлдэг тэрээр энэ удаа өмнөх ерөнхий сайдынхаа асуултанд нилээд сонирхолтой хариу барилаа.

Ерөнхий сайд асан С.Батболд “2012 оны байдлаар эдийн засгийн өсөлт 17-18 хувьтай байсан. Гэтэл 2013 онд яагаад буурав. Ямар шалтгаан нөлөөлөв. Уналтыг юу гэж дүгнэж байна вэ. Өмнөх Засгийн газар энэ бүхэнд буруутай мэтээр ярьж байна. Уг нь 4 жилийн ихэнх хугацаанд нь Ардын нам, Ардчилсан нам хамтраад Засгийн газрыг байгуулж ажилласан. Сүүлийн 2-3 сарыг эс тооцвол. Хамтдаа шийдвэр гаргаж, хэрэгжүүлж ирсэн. Өмнөх Засгийн газарт дутуу дулимаг хийсэн ажил бий, түүнийг үргэлжлүүлээд, алдааг нь засаад явах эрх, үүрэг нь дараагийн Засгийн газарт байх ёстой. Ингэж байж төрийн залгамж чанар хадгалагдах ёстой биш үү” хэмээн асуусан юм. Харин “алх барьсан хүний өмнө бусад нь хадаас шиг харагддаг” гэдэгт итгэсэн Н.Алтанхуяг “Би их тэвчээртэй хүн учраас найман сарын турш ярилгүй явж ирлээ. Алийн болгон баасыг чинь цэвэрлэж суух юм. Одоо бүгдийг хэлчихье.

Тавантолгойг өмнөх Засгийн газрын үед гэрээг байгуулж, шийдсэн. Гэтэл гэрээ байгуулсан “Чалько” компаниас 350 сая ам.доллар урьдчилж авсан. Гэрээ нь маш ашиггүй учраас алдагдал хүлээсэн. Одоо бид “Чалько”-д 186 сая ам.долларыг төлөх ёстой. Хөгжлийн банкны 600 сая ам.долларын бонд байна. Наад бондоороо юм хийгээч гэж би та нарт хэлж байсан, “Хугацаа тулсан учраас боломжгүй” гэдэг хариултыг өгч байсан. Хүүд нь улсын төсвөөс 27.3 сая ам.долларыг гаргаж төлсөн. Харин бидний хувьд урьдын ийм алдааг давтахгүйн тулд Чингис бондын хувьд ямар нэг байдлаар хөдөлж байх ёстой гэж үзээд Монголбанк менежментийг хийж байгаа. Алдагдалгүй хүүгээр арилжааны банкуудад зарим хэсгийг байршуулаад зарим хэсгийг гадаадад байршуулаад явж байгаа. 25-уулаа нийлж байгаад огцруулах асуудал тавьж байгаа учраас би энэ бүхнийг хэлэхээр шийдлээ. Оюутолгой төсөл юу болсон билээ, 250 сая ам.долларыг урьдчилж авсан, хүүтэйгээр. Тэгээд иргэдэд нэг сая төгрөгөөр бэлнээр мөнгө тараасан, иргэдэд бас сар тутамд мөнгө олгоод тараагаад дуусаа биздээ. Одоо юу яриад байгаа юм” хэмээн хариулав. Ийнхүү Монголын сүүлийн хоёр ерөнхий сайдын таарамжгүй харилцаа хандлага улс төр сайхангүй байгааг илтгэнэ.

Одоохондоо Н.Алтанхуяг үнэхээр эр зоригтоо эрдэж байна. Яагаад гэвэл тэр энэ удаа суудалдаа үлдэх бүрэн боломжтой. Учир нь одоогийн УИХ 74 хүний бүрэлдэхүүнтэй байгаа. Түүний 33 нь АН, 25 нь МАН, 11 нь эвсэл, 2 нь ИЗНН, 3 бие даагч. Н.Алтанхуяг намынхаа 33 дээр нэмж Иргэний Зоригийн 2, эвслийн 7 гишүүнийг өөрийнхөө төлөө санал өгүүлнэ. Яагаад гэвэл С.Оюун сайд хийж байгаа учир эсрэг санал өгөхгүй. Харин Д.Тэрбишдагва, Ч.Улаан хоёр одоогийн судлаасаа буухыг хүсэхгүй. Хэрэв буувал өөрсдөө төдийгүй төрд байршуулсан хамаатан садан нь бүгд ажилгүй болно. М.Энхсайханыг Тавантолгойн станцын дарга болгож байгаа учир М.Сономпил бас эсрэг санал өгөхгүй. Тэгээд ч өөрөө бас ажилгүй болно. Дээр нь Н.Энхбаярт гомдсон Ц.Оюунбаатар ерөнхий сайдын талд зогсоно. Н.Батцэрэг, Г.Уянга, Д.Батцогт нар ерөнхий сайдыг огцруулах арай болоогүй гэж мэдэгдээд байгаа. Мөн ерөнхий сайд Н.Алтанхуяг “Монрос”-ын захирал, Татварын дэд даргаар  бие даагч Х.Болорчулуун, Ц.Даваасүрэн хоёрын дүүг томилж өөртөө татаад авсан. Тэд эсрэг санал өгөхөөргүй болсон. Ингээд тооцоод үзвэл Н.Алтанхуягийн талд УИХ-ын 74 суудлын 44 нь байна гэсэн үг юм. Харин түүний эсрэг МАН-ын 25 дээр бие даагч С.Ганбаатар, эвслийн Л.Цог, З.Баянсэлэнгэ, О.Баасанхүү, Ц.Цолмон нар нэмэгдэх магадлалтай. Энэ бүхнийг нэмэгдэнэ гээд тооцвол ердөө 30 болж байна. Бүтэн 10 суудлын зөрөө гарч байна. Тэгэхээр Н.Алтанхуяг том байхаас аргагүй л дээ. Гэхдээ том байна гэж хүчиндээ эрдээд сөрөг хүчнийхээ гишүүдийн асуултад хариулж чадахгүй бүдэрч, “Тавхан үнгэндээ танигдаад” байж бас болохгүй.