ОХУ-ын төрийн албан тушаалтнууд хөрөнгө орлогынхоо мэдүүлгийг өгч эхлэв. Парламентын хоёр танхимын гишүүд, ерөнхийлөгч Владимир Путин, ерөнхий сайд Дмитрий Медведев түүний Засгийн газрынхан орлогоо хэдийнэ тайлагнажээ.В.Путин өнгөрсөн 2012 онд 5.8 сая рублийн орлого олжээ. Энэ нь ерөнхий сайд байсан үеэсээ орлого нь нэмэгдсэн хэрэг бөгөөд ерөнхийлөгчийн сонгуулиас өмнөх дөрвөн жилд тэрбээр 17 сая буюу жилд дунджаар 4.25 сая рублийн орлоготой байсан юм. Шинэ мэдүүлгээр бол түүний өмч хөрөнгөнд өөрчлөлт ороогүй байна. Өөрөөр хэлбэл 77, 153 м/кв талбайтай хоёр байр, эх орны үйлдвэрийн “ГАЗ-М21, “ГАЗ-М21-Р”, “Нива” машинууд, “Скиф” чиргүүлээ урьдын адил яг хэвээр нь мэдүүлсэн байна. Түүний эхнэр Людмила Путина 2012 онд 120 мянган рублийн орлоготой байжээ. Орлогын эх үүсвэрийг мэдүүлэгт заадаггүй бөгөөд банкин дахь хадгаламжийн хүү нь ийм болсон бололтой. 2011 онд тэрбээр 400 мянган рублийн орлого олсон хэмээн мэдүүлж байв.
Ерөнхий сайд Д.Медведевийн хувьд өнгөрсөн жилийн орлого нь В.Путиныхтай ойролцоо буюу 5.814 сая рубль болжээ. Тэрбээр 367 м/кв байр, дотоодын үйлдвэрийн хоёр машинтай бол эхнэр нь “Volkswagen Golf” машин нэгтэй, харин 2012 онд ганц ч рублийн орлого олоогүй гэнэ. Төрийн дараагийн өндөрлөгүүд болох парламентын хоёр танхимын дарга дээрхээс арай бага орлого олсон бөгөөд өмч хөрөнгө нь ч ойролцоо аж.
Оросын Төрийн Думын хамгийн баян гишүүн нь “Нэгдсэн Орос” намын депутат Григорий Аникеев ажээ. 2012 онд 1.1 тэрбум рублийн орлого олсон тэрбээр хувьдаа нэг хаус, гурван орон сууц, цэвэр усны шугам, 8.7 км урттай засмал зам болон “Hummer H2” тэргүүтэй таван машин, газар уснаа явагчтай гэнэ. Харин Оросын парламентын дээд танхимын тэргүүн баян Дмитрий Ананьев 700 сая долларын орлого мэдүүлсэн бөгөөд нийтдээ 58 мянган кв/м талбайтай 40 газар, дөрвөн хаус, долоон орон сууц, таван машин, газар уснаа явагч, моторт завьтай аж. Парламентын гишүүн болохоосоо өмнө бизнесмэн байсан тэрбээр 1.7 тэрбум долларын хөрөнгөөрөө “Forbes” сэтгүүлийн дэлхийн баячуудын жагсаалтад бичигддэг юм.
Харин Кремлийн хамгийн баян албан хаагч нь ОХУ-ын ерөнхийлөгчийн туслах Юрий Трутнев аж. Байгалийн нөөц, экологийн сайд байсан тэрбээр өнгөрсөн онд 210 сая рублийн орлого олжээ. Харин Д.Медведевийн Засгийн газарт хэзээнээс хамгийн баян нь байсан, ерөнхий сайдын орлогч Игорь Шувалов эхнэртэйгээ нийлээд өнгөрсөн онд 450 сая рублийн орлого олсон байна. Тэд мөн Арабын Нэгдсэн Эмират, Их Британи, Швейцарьт тус бүр нэг хаус түрээслэдэг ажээ. Оросын хуулиар төрийн албан тушаалтнууд гадаадад үл хөдлөх хөрөнгөтэй байж болдог, харин одоо хэлэлцэж буй хуулиар бол гадаадад данс, гадаадын компанийн хувьцаа эзэмшиж болохгүй болох юм. Тиймээс тэд хилийн чанад дахь үл хөдлөх хөрөнгөө мэдүүлэгтээ мөн дурьдсан байна. Засгийн газрын хэд хэдэн гишүүн мөн зарим албан тушаалтнууд Швейцарь, Итали, Их Британи, Испани, Болгарт хаус, орон сууцтай ажээ. Харин парламентын дээд танхимын 19 гишүүн гадаадад үл хөдлөх хөрөнгөтэйн байршил нь АНУ-аас Финлянд хүртэлх өргөн уудам нутагт байна. Мөн Төрийн Думын гишүүдийн нэлээд нь Испанид, улмаар зарим нь Украин, Латви, Гүрж, АНУ, Кипр, АНЭ, Франц, Германд байр савтай бөгөөд хамгийн сонин байрлалтай нь “Нэгдсэн Орос” намын депутат Михаил Слипенчук Африкийн Конго улсад хувийн байшинтай ажээ.
