Улсын дуурь бүжгийн эрдмийн театр маргааш 17:00 цагт Дж.Вердийн "Риголетто" дуурийг тавихаар бэлтгэж байна. Гурван бүлэг дөрвөн үзэгдэлтэй тус дуурийн гол дүрд П.И.Чайковскийн нэрэмжит олон улсын дуурийн дуучдын уралдаанд амжилттай оролцож, мөнгөн медаль хүртсэн гавьяат жүжигчин Э.Амартүвшин тоглохоор болжээ. Тус дуурь нь 16-р зууны үеийн Италийн Мантуе хотын хааны ордны зугаа цэнгэлийг харуулахаас гадна түүний золиос болж байгаа "Риголетто" хэмээх алиа салбадай болон түүний охин Жильдагийн хайр сэтгэл, амьдралын түүхийг өгүүлдэг билээ. Вангийн ордны өвгөн салбадай үнэт эрдэнэ болох ганц охиныхоо төлөө бүхнийг хийсэн ч атгаг санаа хорон үйлийнхээ хариуд охиноо алдана.  В.Гюгогийн “Хааны зугаа цэнгэл” зохиолоос сэдэвлэсэн "Риголетто" дуурийг энэ удаад найруулагч Ё.Цэрэндолгор найруулж байна. “Риголетто” бол хөгжмийн зохиолч Ж.Вердийн оргил бүтээлүүдийн нэг бөгөөд дуурийн дуучдаас өндөр ур чадвар, техник, жүжиглэлт шаарддаг.  Дуучин Э.Амартүвшин энэхүү дуурьд удаан бэлтгэсэн бөгөөд П.И.Чайковскийн нэрэмжит олон улсын уралдаанд "Риголетто"-ийн ариг дуулж үзэгчдийг уйлуулж чаджээ.