Дэлхийн спортын авиралтын хаан уул ертөнцийн хоёр дах ноён оргил К2 уул нь Пакистан улсын нутаг дэвсгэрт далайн төвшинөөс дээш 8611 м өндөрт оршдог. К2 уул нь дэлхийн хамгийн хүнд 10 авиралтын нэгдүгээрт ордог.

Өнгөрсөн 60 жилийн түүхэнд дэлхийн зулай Эверест ууланд манай гарагийн 3000 гаруй хүн авирч оргилд гарсан байхад К2 ууланд түүний 10 хүрэхгүй хувь нь авирсан байдаг юм. Үүнээс эмэгтэй уулчдын нийт 11 хүн оргилд гарч, буухдаа 4 уулчин нь осолдсон байдаг юм. Тамирчин хүн олимп, тив дэлхийн аварга болохыг ямагт хүсдэгийн адил дэлхийн 8000м-ээс дээш өндөртэй 14 оргил түүний дотроос топ гурван оргилийг /Эверест, К2, Канчинжунга/ мөрөөдөхгүй уулчин байхгүй.

МУГТ Б.Гангаамаа 2008 оноос эхлэн К2 уулын судалгаа, бэлтгэл ажил, сургуулилтыг хийж ирсэн бөгөөд энэ оны ирэх зургаадугаар 10-аас наймдугаар сарын 20-ны хооронд 70 хоногийн хугацаатай олон улсын багтай хамтран авирхаар бэлтгэл сургуулилтаа базааж байна.

МУГТ Б.Гангаамаагийн К2 уулын авиралтын ерөнхий зохион байгуулагчаар Соёл, спорт, аялал жуулчлалын яам болон яамны харъяа Спортын бэлтгэлийн төв хамтран ажиллаж байна.
Б.Гангаамаагийн төлөвлөгөөт авиралтын өмнөх өндөр авалт, бэлтгэл сургуулилт оросын холбооны улсад энэ оны тавдугаар сарын 5-25-ны хооронд хийгдэх бөгөөд мөн Пакистан Улсын Броуд-Пик ууланд долоо хоног өндрийн бэлтгэл хийх юм. МУГТ Б.Гангаамаа нь энэ 06 дугаар сарын 10-нд эх орноосоо мордох юм.