С.Гончигсумлаагийн нэрэмжит Хөгжим бүжгийн коллежийн багш, доктор Б.Батжаргалын “Америкт учирсан уран сайхан” ном хэвлэгдэн гарлаа. Зохиогч уг номондоо АНУ-д 10 гаруй жил ажиллаж, амьдрахдаа үзэж, харсан урлаг соёл, энтертайментийг сонирхолтойгоор өгүүлсэн аж. Номын зохиогч энэхүү номоо “сэтгүүлзүйн туршиц” гэж давхар тайлбартайгаар нэрлэжээ. Тэрээр номын бүлэг хэсгүүддээ мэдээ- нийтлэл, эсээ-тэмдэглэл, хөрөг-шүүмж, фельетон-асуудалт өгүүлэл, эрдэм-судалгааны өгүүлэл зэрэг урлагийн сэтгүүлзүйн бичлэгийн үндсэн төрөл жанруудад хувааж, бүлэг тус бүрт өөрийн туурвисан бичвэрийг оруулсан байна. Түүнчлэн цирк, балет, кино, мюзикл, хөгжмийн урлагийн олон сайхан бүтээлийг ойлгох түлхүүртэй танилцаж, америкийн энтертайментийн ертөнцийн цоо шинэ, сэргэг мэдээллийн нууцад нэвтэрч, бүтээсэн арга технологийг нь энэхүү номноос таних боломжтой юм. Номын нээлт өнөөдөр Хөгжим бүжгийн коллежийн номын санд болох аж.