Гадаад харилцааны сайд Л.Болд НҮБ-ын Ерөнхий нарийн бичгийн дарга /ЕНБД/-ын орлогч бөгөөд НҮБ-ын Женев дэх төвийн Ерөнхий захирал Кассим-Жомарт Токаевыг 4 дүгээр сарын 28-ны өдөр Төрийн ордонд хүлээн авч уулзлаа.Сайд Л.Болд Улаанбаатар хотноо болж буй Ардчилсан орнуудын хамтын нийгэмлэгийн Сайд нарын 7 дугаар Бага хуралд НҮБ-ын ЕНБД-ыг төлөөлөн өндөр түвшинд оролцож буйд нь талархал илэрхийлээд, НҮБ Монгол Улсын харилцаа, хамтын ажиллагааны талаар санал солилцлоо. Чингэхдээ Далайд гарцгүй хөгжиж буй орнуудын судалгааны төвийн үйл ажиллагааг урагшлуулах чиглэлээр авч хэрэгжүүлж буй ажлуудын талаар мэдээлж, НҮБ болон түүний системийн байгууллагуудад ажиллах Монгол иргэдийн тоо, албан тушаалын зэрэглэлийг нэмэгдүүлэхэд дэмжлэг хүсч буйгаа илэрхийлэв.
Ноён К.Ж. Токаев манай улсыг АОХН-ийг амжилттай даргалж, энэхүү байгууллагын үйл ажиллагааг өргөжүүлэхэд үнэтэй хувь нэмэр оруулж буйг тэмдэглээд, Монгол Улс олон улсын энх тайван аюулгүй байдлыг бэхжүүлэх, тогтвортой хөгжлийг хангахад оруулж буй хувь нэмрийг сайшаав. Тухайлбал, НҮБ-ын энхийг сахиулах ажиллагаанд оруулж буй манай улсын хувь нэмрийг өндрөөр үнэлж, Монгол Улсын цөмийн зэвсэггүй статус ба олон улсын аюулгүй байдлын талаарх манай улсын санаачилгыг дэмжин ажилладагаа илэрхийлэв. Түүнчлэн тэрээр Монгол Улс 2012 онд Европын аюулгүй байдал, хамтын ажиллагааны байгууллага /ЕАБХАБ/-д элссэн явдлыг онцолж, өнгөрсөн жил болсон НҮБ-ын 67 дугаар чуулганаар манай улсаас санаачлан батлуулсан “Ардчиллын төлөө боловсрол” тогтоолыг дэмжиж баяр хүргэв.
НҮБ-ын Ерөнхий нарийн бичгийн дарга орлогч, НҮБ-ын Женев дэх төвийн Ерөнхий захирал Кассим-Жомарт Токаев 2013 оны 4 дүгээр сарын 29-ний өдөр НҮБ-ын ЕНБД Бан Ги-Мүний илгээлтийг дамжуулна.
