Шастины нэрэмжит III эмнэлгийн Стратеги төлөвлөлт эрхэлсэн орлогч дарга Л.Баярцэцэг төрсөн дүүгээ ял эдлэхээс хамгаалж, өвчний  түүхийг нь өөрчилсөн хэрэг гарсан билээ. Л.Баярцэцэгийг  Эрүүгийн хуулийн 245 дугаар зүйлийн хоёр буюу хэрэг бүртгэлт, мөрдөн байцаалт, шүүн таслах ажиллагаанд албан тушаалаа ашиглаж дүгнэлт үйлдсэн, 226 дугаар зүйл буюу компьютер, компьютерийн программ, түүний төхөөрөмжийг санаатайгаар өөрчилсөн, эвдсэн, гэмтээсэн, ашиглах боломжгүй болгосон, мэдээллийн сүлжээг сүйтгэсэн зэрэгт буруутгаж байгаа юм. Хэрвээ түүний гэм буруутай нь нотлогдвол  3-5 жил хүртэлх ялаар шийтгэх юм. Тэрээр хийсэн үйлдлээ мөрдөн байцаалтын явцад хүлээн зөвшөөрсөн байна. Мөн энэхүү хэргийг ганцаараа бус тус эмнэлгийн их эмч А.Баярзаяа, лаборант Д.Оюунсүрэн, Ба.Сувд нартай хамтарч хийсэн гэдгээ ч  мэдэгдсэн байна. Тиймээс эдгээр хүмүүсээс  мөрдөн байцаалт авч эхэлжээ.

Хэргийг сануулахад, Л.Баярцэцэг нь  Баянзүрх дүүргийн хоёрдугаар хэлтэст хүнд гэмт хэрэгт шалгагдаж байсан төрсөн дүү Л.Батмөнхийг ялаас мултлах зорилгоор элэгний хүнд өвчтэй гэсэн онош тавьж өөрчилжээ.  Эхний өгсөн мэдүүлгээр Л.Баярцэцэг  эмнэлгийнхээ төв сервер рүү  тус эмнэлгийн эмч А.Баярзаяа нарт үүрэг өгч нэвтрүүлэн дүүгийнхээ өвчний оношийг өөрчлүүлжээ.