Америк, Европ, Азийн улс орнуудаар 2006 оноос хойш тойрон аялж буй Японы гэрэл зургийн үзэсгэлэн ирэх даваа гаригт нээлтээ хийнэ. Энэхүү үзэсгэлэнд 1970 оноос өнөөдрийг хүртэлх Японы байгаль, нийгмийн өөрчлөлтийг тусгасан 76 ширхэг гэрэл зураг оролцох юм.
Тус үзэсгэлэн нь "Хувьсах нийгэм" ба "Хувьсах байгаль" гэсэн хоёр бүлгээс бүрдэх ба эхний бүлэгт голчлон нийгмийн оршихуй болох хүн сэдэвтэй бүтээлүүд, дараагийн бүлэгт хот, бүс газар, байгалийн үзэсгэлэнг буулгасан бүтээлүүд багтана. Японы эдийн засгийн өндөр хөгжлийн үеийн төгсгөлөөс зуун солигдох үе хүртэлх Японы нийгэм, соёлын өөрчлөлтийг олон өнцгөөс тусгаж, одоо үетэй хэрхэн нүүр тулан өөрчлөгдөж буйг харуулсан гэрэл зургуудаас бүтсэн энэхүү үзэсгэлэнгээр дамжуулан та бүхэн орчин үеийн Японы гэрэл зургийн мөн чанар, соёлын мэдлэгээ баяжуулах боломжтой. Үзэсгэлэнг Японы Элчин сайдын яам, Япон сан зохион байгуулж байгаа бөгөөд Г.Занабазарын нэрэмжит Дүрслэх урлагийн музейд нээгдэх аж.
