Энэ оны өсвөрийн жүдо бөхийн улсын аварга шалгаруулах тэмцээнийг энэ жил спортьн мастер, дасгалжуулагч Дамбын Гансүхийн нэрэмжит болгон зохион байгуулав. Тэмцээнд Улаанбаатар, Хангай, Зүүн, Баруун, Төв гэсэн таван бүсээс шалгарсан МЖБХ-ны гишүүн хот болон хөдөө орон нутгийн дэвжээ, клубүүд 77 байгууллагын 385 эрэгтэй, 235 эмэгтэй нийт 620 өсвөрийн жүдоч өрсөлдсөн байна. Энэ тэмцээний түрүү бөхчүүд долдугаар сард АНУ-ын Миами хотод болох өсвөрийн жүдочдын ДАШТ-д оролцох эрх авсан юм. Мөн БНХАУ-ын Наньжинд болох Азийн хүүхдийн их наадам, Хайнань мужид зохиогдох өсвөр үе, залуучуудын тэмцээн, цаашлаад долдугаар сард Тайваньд, наймдугаар сард Тайландад болох өсвөрийн олон улсын тэмцээнд оролцох юм билээ. Уг тэмцээнд багийн дүнгээр эрэгтэйчүүдэд “Тэмүүжин” клуб, эмэгтэйчүүдэд Өвөрхангай аймгийн баг манлайлсан байна.