Говь-Алтай аймгийн Цээл суманд үйл ажиллагаагаа явуулж буй “Алтайн хүдэр" компанийн хамгаалалтын “Сонор-Х” албаны ажилтнууд өчигдөр сэтгүүлчдийн эрхэнд халдсан хэрэг гарчээ. Тодруулбал,  тус компанийн үйл ажиллагааны ерөнхий байдлын дүрс бичлэгийг авах гэж байсан сэтгүүлчдийг хөөж,  “Монгол НD” телевизийн камер, сэтгүүлчдийн хамт явсан иргэний “I рhоnе4” гар утсыг хамгаалалтын ажилчид нь булааж, зугтжээ. Энэ үед сэтгүүлчид “Алтайн хүдэр” компанийн хамгаалалтын бүсэд нэвтрээгүй байсан байна. “Алтайн хүдэр” компани БОНХЯ-наас өгсөн хугацаатай үүрэг даалгаврыг хэрхэн биелүүлж байгаа, үйл ажиллагаа нь байгаль орчинд ямар нөлөө үзүүлж буйг  сурвалжлуулахаар “Шинэ зууны Цээл” төрийн бус байгууллагынхан сэтгүүлчдийг Говь-Алтай аймагт аваачсан юм. Гурван машин бүхий зургаан хамгаалагч “Алтайн хүдэр”-рүү сэтгүүлчдийг ойртуулахгүй байсан бол дугаар шилжих мөчид хүчээ нэмж, “Фургон” дүүрэн хүн ирсэн тухай эх сурвалж мэдээллээ.